10, 17 і 24 чэрвеня ў Мінску каля Ратушы адбудуцца канцэрты пятага сезону праекта «Джазавыя вечары з Банкам БелВЭБ», на якіх выступяць музыкі з ЗША, Нідэрландаў, Францыі, Чылі, Туніса, Туркменістану і Беларусі. Пачатак мерапрыемстваў у 20:00, уваход вольны .
Стартаваўшы ў 2013 годзе, «Джазавыя вечары» хутка сталі адным з улюбёных мерапрыемстваў мінчан. Удзел лепшых музыкаў з розных краін і асаблівая атмасфера летняга горада забяспечылі кожнаму выступу шматтысячны аншлаг. Менавіта «Джазавыя вечары» падарылі Мінску фармат штотыднёвых канцэртаў на вольным паветры ў цэнтры сталіцы.
У праграме пятага сезону вакальныя і інструментальныя выступы розных стыляў і напрамкаў: этна-джаз, класічны джаз, свінг, арыентал-джаз, ф’южан, джаз-фанк, джаз-соўл, модэрн-джаз, мэйнстрым, рытм-энд-блюз, кантэмпарары і іншых. Арганізатарамі мерапрыемства ў гэтым годзе выступаюць Мінгарвыканкам і канцэртная агенцыя «4А-Івэнт». Генеральны партнёр фестывалю – ААТ «Банк БелВЭБ».
10 чэрвеня зоркай вечару будзе знакаміты Скот Хэндэрсан (ЗША), уладальнік тытулаў «Джазавы гітарыст №1» (па версіі часопіса Guitar World) і «Лепшы джазавы гітарыст» (па версіі Guitar Player). Ён выступіць у суправаджэнні французскіх музыкаў Арчыбальда Лаганьера (бас) і Рамана Лабайе (бубны). Таксама на сцэну выйдуць: спявак і мультыінструменталіст Харысан Янг (ЗША/Нідэрланды), этна-джазавы дуэт Agata (Беларусь), VIP-jazz Андрэя Славінскага.
17 чэрвеня сваю праграму прадставіць бас-гітарыст Крысціан Галвэз (Чылі), пераможца прэміі Altazor як лепшы джазавы выканаўца Лацінскай Амерыкі ў 2000 і 2004 гадах, а таксама намінант American Music Awards 2005, які выступіць з трубачом Крысціанам Куцюруфо (Чылі) і бубначом Назарам Рэджэпавым (Туркменістан). Таксама гледачоў чакае сустрэча з канцэртным аркестрам Барыса Мягкова (Беларусь) і «Трыа Канстанціна Гарачага» (Беларусь).
24 чэрвеня музычную эстафету падхопіць Кліўленд Джонс (ЗША) – спявак, кампазітар, які выконвае сімбіёз госпелу, рытм-энд-блюзу, фанку і традыцыйнага джазу, уладальнік бязмежных вакальных магчымасцяў і тытулу «Адкрыццё году» ад аўтарытэтнага сайта SoulTracks.com. Таксама выступяць: кампазітар, гітарыст, лютніст і спявак Набіль Хэмір (Туніс), вакальны квартэт Minsk Voices (Беларусь), Premier Orchestra (Беларусь).
