09.09.2009 | Тузін. Перазагрузка

“Нестандартны варыянт” зрабілі працяг “Паветранага шару”

У межах праекту “Тузін. Перазагрузка” інтэрнэт-парталу “Тузін Гітоў” і грамадскай кампаніі “Будзьма беларусамі!” гурт “Нестандартны варыянт” прадстаўляе сваю песню “У неба”. У беларускім варыянце яна раптоўна стала асацыятыўным працягам рэп-версіі “Паветранага шару”, запісанай колісь “Нестандай” разам з IQ48 і Лявонам Вольскім.

Вакаліст гурта “Нестандартны варыянт” Зміцер Міхневіч прызнаецца, што з уласна беларускага рэпу яму мала што даспадобы: “Нічога такога, што вельмі б мяне ўразіла, на беларускай мове я не чуў. Як правіла, усе беларускамоўныя рэп-тэксты – на палітычную тэматыку, а хочацца проста сацыяльных песняў”. Самі хлопцы па-беларуску не спяваюць: “Не тое каб мы кепска ведалі сваю мову, спакойна магу чытаць, з вымаўленнем праблемаў няма, але вось сачыняць – куды складаней”, – прызнаецца Міх.

Музыкі прызнаюцца, што сэнс іх песні “У неба” крыху змяніўся ў беларускай версіі, якую зрабіў літаратар Сяргей Балахонаў. “Яна набыла больш востры палітычны кантэкст, – апавядае Міх, – з’явіліся “людзі на пляцах”. Сапраўды, яе можна назваць асацыятыўным працягам “Паветранага шару”. Выйшла так, што мы працягнулі тэмытыку той песні, запісанай для трыб’юту N.R.M.”

Хлопцы з “Нестанды” задаволеныя вынікам – на 90 працэнтаў, як яны кажуць, бо лічаць, што рэдка калі можна дасягнуць максімуму. Музыкі не супраць працягнуць беларускамоўны эксперымент, калі “тэкст падгоніць хто”.

Нестандартны варыянт – У неба (музыка – Зміцер Міхневіч, Андрэй Піражэнка, тэкст – Зміцер Міхневіч, Віталь Маркін, Уладзімер Стэцюк, беларускі тэкст – Сяргей Балахонаў).


Адзін каментар у ““Нестандартны варыянт” зрабілі працяг “Паветранага шару””

  1. Valer-ka says:

    Немагчыма спампаваць, памылка 404.

Дадаць каментар

*

*

Апошнія навіны

Яндекс.Метрика