Жанчына не павінная кіраваць мужчынам: гэта закон!
Ага, канечне. Ім толькі дай волю — квартплата не будзе аплачаная, посуд застанецца непамытым, заробак — выдаткаваным на цюнінг аўто, а з дзіцячага садка будзе прыведзенае не тое дзіця.
Чаму яны такія лянівыя, безыніцыятыўныя, не носяць на руках, не саступаюць месца? А яшчэ падымае галаву эмансіпацыйны мужчынскі рух: яны пачынаюць змагацца за роўнасць і права не саступаць цяжарным у метро! Ну як імі можна не кіраваць?
Як, як. Намаганнем волі.
…Свята скончанае, госці паціху разыходзяцца, але раптам на ўсю кватэру разносіцца гучны загад:
— Не загадвай мне! Перастань мной кіраваць! Перастань мне казаць, што і як рабіць!
Прысутныя, шчыра кажучы, ажно здрыгануліся. Што там адбываецца ў гэтай прыемнай маладой пары? Магчыма, хлопец загадаў дзяўчыне перастаць насіць абцасы і кароткую спадніцу, настойліва параіў змяніць працу, здаць бацькоў у прытулак, а яго прапісаць на вызваленай жылплошчы? Аднак не: гэты кат і тыран паспрабаваў параіць, якім транспартам зручней дабірацца дадому.
Тру сторы. Магу яшчэ дадаць, што прысаромлены хлопец схіліў галаву і сказаў: “Ну ок”.
Але была там і іншая дзяўчына, якой дзіўным і неверагодным чынам вельмі шчасціла па жыцці з прадстаўнікамі моцнага полу. Яе мужчына загадаў ёй сядзець роўна і выклікаў таксоўку.
Я ведаю сакрэт іншай дзяўчыны. Яе мама, цётка і бабуля яшчэ ў дзяцінстве патлумачылі ёй, што дзеля жаночага шчасця давядзецца папрацаваць — над сабой; што свой лёс трэба трымаць у сваіх руках; а для гэтага патрэбныя дыпламатычныя, а не рэвалюцыянерскія метады. Яны патлумачылі дзяўчынцы, што кіраваць мужчынамі трэба так, каб яны пра гэта не здагадваліся.
“Збоку выглядае, нібыта я проста ляжу ў ложку; а насамрэч я вельмі павольна іду на працу”, — гэта не анекдот, а інструкцыя сусветнага валадарства. Што зрабіла іншая дзяўчына, каб ёй выклікалі таксоўку? Нічога. Яна села, заклала нагу за нагу і паставіла перад мужчынам задачу: транспартаваць яе з пункту А ў пункт Б. Той адразу распусціў хвост і дэманстратыўна выканаў геройскую місію. Дзяўчына задаволеная — яе “пранеслі на руках”, хлопец задаволены — выратаваў сусвет; каму дрэнна? А дрэнна той, у каго хлопец — безыніцыятыўны слімак; ну і сам слімак пачуваецца не надта.
Загадны жаночы голас нясецца па-над Беларуссю, нібыта мы — на спустошаным полі бою, і адзіная ацалелая спрабуе дазнацца: “Хто з афіцэраў застаўся?” — і, не прычакаўшы адказу, бярэ камандаванне на сябе. Выхавацелька ў дзіцячым садку загадвае даесці кашу, заплюшчыць вочы і спаць, вярнуцца на тэрыторыю пляцоўкі. Настаўніца загадвае. Мама штосьці загадвае. Начальніца на працы, ясны дзень, таксама загадвае — але ёй можна. Ну і дзяўчына кіруе працэсам. Як тут не ўзняць галаву і не пачаць адваёўваць права сядзець у метро? Сум, журба і роспач.
Але варта толькі ўзяць сябе ў рукі і забараніць сабе праяўляць ініцыятыву, як планеты Сонечнай сістэмы вяртаюцца на месцы, неба робіцца блакітным, трава — зялёнай, жанчыны — шчаслівымі, а мужчыны — з імі за кампанію.
Хопіць тэорыі, пачынаем практычную частку. Пара едзе ў аўтобусе, набліжаецца патрэбны прыпынак. Што робіць нявыхаваная дзяўчына? Яна загадвае: “Падымайся, нам выходзіць”. Што робіць выхаваная? Ёй усё адно, хай прыпынак і будзе прапушчаны. Вырашаць гэтую складаную сітуацыю ўсё адно давядзецца не ёй. Няправільная дзяўчына нават сама не заўважае, што ператварае свайго мужчыну ў інфантыльнага хлопчыка: прачынайся, ты спознішся на працу; надзень шапку; еш на абед суп. Проста дзіўна, як ён раней не страчваў працу праз прагулы, не адмарозіў вушы і не сапсаваў страўнік. Як ён выжываў у гэтым жорсткім свеце?
Тут патрэбная вытрымка. Дапусцім, вы ўсклалі на мужчыну адказны абавязак забяспечваць дом прадуктамі. Што трэба зрабіць праз тыдзень, сузіраючы голую лядоўню? Прыгатаваць на вячэру гарбату. Два дні вадкай дыеты і ніводнага папроку з вашага боку — і лядоўня запоўніцца магічным чынам. Калі ён страціў працу — што рабіць? Напісаць за яго рэзюмэ і прызначыць ад ягонага імені некалькі сустрэчаў з працадаўцамі? Ні ў якім выпадку. Можна толькі выказаць цвёрдую ўпэўненасць у тым, што ён сам выдатна зарыентуецца. Кватэра не была ў час аплачаная, і гаспадар вас высяляе? Цудоўная сітуацыя. Можаце знайсці жытло, але толькі для сябе. Божанька вас выратаваў ад безнадзейна сапсаванага хлопчыка.
Вас атачаюць толькі маленькія хлопчыкі сталага веку? Аддайце ім штурвал. Толькі не забудзьцеся назваць патрэбны вам порт.
Югася Каляда
