Адкрыццё часовай літаратурна-мастацкай экспазіцыі “Краіна мястэчкаў Анатоля Каплана”
Пачатак: 12.07 (17:00)Дзяржаўны музей гісторыі беларускай літаратуры
Дзяржаўны музей гісторыі беларускай літаратуры і Рагачоўскі музей Народнай Славы запрашаюць 12 ліпеня 2017 года а 17-й гадзіне на адкрыццё часовай літаратурна-мастацкай экспазіцыі “Краіна мястэчкаў Анатоля Каплана”. Бліскучы майстра літаграфіі, аўтар знакамітых ілюстрацый да твораў Шолам-Алейхема Анатоль Каплан нарадзіўся 10 студзеня 1903 года ў горадзе Рагачоў на Беларусі. Усё свядомае жыццё мастак пражыў у Пецярбургу, але на творчасць яго натхнялі ўспаміны дзяцінства, якія назаўсёды захавалі самыя дробныя дэталі местачковага побыту, твары шматлікіх сваякоў, суседзяў і сяброў.
Найбольшую вядомасць набылі станковыя літаграфіі мастака па творах яўрэйскіх класікаў. У іх ён здолеў перадаць паэтыку і глыбінную сутнасць літаратурных крыніц. У літаграфіях па матывах твораў Шолам-Алейхема мастак з гумарам і смуткам паказвае стойкасць чалавека ў барацьбе за шчасце. Створаныя творы не з’яўляюцца ілюстрацыямі ў агульнапрынятым сэнсе: іх прастора больш шырокая і рознабаковая, дзякуючы эмацыйнай памяці мастака. Сродкі, якія выкарыстоўваў майстра, багатыя і разнастайныя. Сярод мастацкіх работ, якія будуць прадстаўлены ў экспазіцыі – цыкл афортаў, прысвечаных яго роднаму гораду Рагачову.
Анатоль Каплан выпрацаваў сваю мастацкую мову, якой, нягледзячы на яркі нацыянальны складнік, уласціва агульначалавечае гучанне, зразумелае ўсім.
Дзякуючы ўнікальнаму майстэрству і высокай прафесійнай рэпутацыі мастак заняў годнае месца ў айчыннай культуры. Працы А. Л. Каплана рэгулярна выстаўляюцца ў многіх краінах Еўропы, ЗША, Канадзе, Ізраілі, Беларусі, набываюцца найбуйнейшымі музеямі.На мерапрыемства запрошаныя прадстаўнікі Міністэрства культуры Беларусі, Пасольства Дзяржавы Ізраіль, супрацоўнікі Музея гісторыі і культуры яўрэяў Беларусі, прадстаўнікі грамадскай дабрачыннай яўрэйскай арганізацыі «Хэсэд – Рахамім», мастакі, пісьменнікі, мастацтвазнаўцы, літаратуразнаўцы, прыхільнікі таленту Анатоля Каплана і інш.
