23 сакавіка 2017 года а 17-й гадзіне ў Нацыянальным мастацкім музеі Рэспублікі Беларусь адбудзецца адкрыццё выставы “Польскі пейзаж. Францішак Рышард Мазурэк. Жывапіс”. Гэта выстава арганізавана пры падтрымцы Пасольства Польшчы ў Рэспубліцы Беларусь у рамках святкавання 25-годдзя ўстанаўлення дыпламатычных адносін паміж Рэспублікай Польшча і Рэспублікай Беларусь. У Беларусі выстава прац мастака адбудзецца ўпершыню.
Францішак Рышард Мазурэк – мастак-пейзажыст, член Саюза польскіх мастакоў. На выставе будуць паказаны каля 40 жывапісных твораў 2004–2016 гг., у якіх адлюстраваны прыгажосць і зменлівасць краявідаў Любліншчыны. У сваіх працах Францішак Мазурэк імкнецца перадаць паэтычнасць і настальгію, характэрную для яго роднага края ў розныя поры года.
З 1987 г. творчасць Францішка Мазурэка была прадстаўлена больш чым на 50 індывідуальных выставах у Заходняй і Усходняй Еўропе, Канадзе, ААЭ і В’етнаме. Таксама яго працы былі паказаны на групавых выставах у Польшчы, Італіі, Балгарыі, Чэхіі, Германіі, Расіі, Румыніі і Венгрыі. Карціны аўтарства Ф.Р. Мазурэка знаходзяцца ў музеях і прыватных калекцыях Еўропы, ЗША, Канады і ААЭ. Мастак узнагароджаны сярэбраным Крыжам Заслугі, сярэбраным медалём “За заслугі ў пажарнай справе”, медалём “За заслугі перад польскай культурай” Міністэрства культуры і Нацыянальнай спадчыны, залатым Крыжам Заслугі ад Прэзідэнта Рэспублікі Польшча, бронзавым медалём “За заслугі ў культуры Gloria Artis” Міністэрства культуры і Нацыянальнай спадчыны.
Выстава працягнецца да 23 красавіка 2017 г.
