Беларусь натхняе не толькі паэтаў-рамантыкаў, але і вытворцаў моднай вопраткі! Пра вытокі і развіццё тэндэнцыі дыскутуем 7 сакавіка ў Горадні.
Часцей і часцей у вялікіх гарадах у натоўпе можна пабачыць маладзёнаў і дзяўчат у цішотках ці байках з рыцарам, купальскім дзядком, арнаментам ці з нейкім “смачным” беларускім словам.
Казаць пра шырокую індустрыю беларускіх брэндавых рэчаў пакуль рана, і разам з тым тэндэнцыя відавочная: беларусы хочуць надзяваць сваё ў літаральным сэнсе. У цішотках з вершнікам на кані ездзіць на спаборніцтвы нават нацыянальная зборная па тайскім боксе.
Вулічная вопратка з сюжэтамі з гісторыі, міфалогіі і мастацтва – гэта часовы трэнд ці глыбокая патрэба выявіць сваё нацыянальнае “я”? Якая філасофія беларускаарыентаванага брэнду адзення? У чым сакрэт яго поспеху? Ці варта выпускаць такую вопратку масава?
Пра гэта пойдзе гутарка на афлайнавым ток-шоу “Быць беларусам да ніткі T-shirt: як патрэба ў самавызначэнні робіцца трэндам?”, якое ладзіць кампанія “Будзьма беларусамі!” у Горадні. У размове возьмуць удзел стваральнікі брэндаў моладзевай вопраткі LSTR, “Важный Гусь”, “КУТ”.
