16 мая ў кавярні “H2O” адбудзецца “Кірмаш праектаў”. Гэта адметная пляцоўка для абмеркавання грамадскіх ідэй, аб’яднаных агульнай мэтай: развіццё культурніцкай прасторы роднага горада.
“Кірмаш праектаў”, які не першы раз ладзіцца ў межах кампаніі “Будзьма беларусамі!”, у Гродна пройдзе ў абноўленым фармаце: гэтым разам кароткія, “маланкавыя”, прэзентацыі канструктыўных прапаноў для культуры будуць дапоўненыя публічнай дыскусіяй пра тыя партнёрскія сувязі, якія мы маем і можам мець паміж культурніцкімі менеджэрамі.
Арганізатары “Кірмашу праектаў” непахісна вераць у велізарны чалавечы патэнцыял гарадзенцаў. Сіламі людзей самых розных, але аб’яднаных любоўю да роднага горада (рэгіёна), можна рэалізаваць шэраг добрых і важных культурніцкіх ініцыятываў на агульную карысць!
Калі Вы маеце цікавую задуму, якая тычыцца творчасці, сацыяльнай працы, экалогіі і аховы здароўя, урбаністыкі і многага іншага, што вызначае якасць нашага штодзённага жыцця, скарыстайцеся магчымасцю расказаць пра гэта невыпадковай і неабыякавай публіцы!
Верагодна, гэта той самы выпадак, калі Вы атрымаеце карысныя парады, патрэбныя кантакты і рэсурсы, а таксама дапаможаце сваімі ўласнымі ведамі і сіламі ідэі, якую даўно чакае Гродна! Удзел у выніковай дыскусіі прымуць арганізатары вядомых культурніцкіх падзей і камунікацыйна-творчых пляцовак у Гродна і Мінску.
Як падрыхтаваць прэзентацыю свайго праекта, можна пачытаць тут. Заяўкі прымаюцца да 14 мая ўключна на скрыню kirmash.hrodna@gmail.com.
Запрашаем усіх зацікаўленых! Уваход на сустрэчу вольны, па папярэдняй рэгістрацыі: для гэтага дашліце сваё імя, прозвішча і кантактны тэлефон на названую вышэй скрыню.
16 мая 2013
Кавярня “H2O”, Гродна, вул. Студэнцкая, 2
Пачатак: 18:00
Падрабязнасці па тэлефонах: (029) 784 32 21, (044) 579 63 39
Будзьма партнёрамі!
