Літаратурна-мастацкае свята “Адамаў шлях пад вечным небам”
Пачатак: 25.09 (08:00)Музей-сядзіба Міцкевічаў “Завоссе”
Як Богу – божы свет, так мой уласны
Дом на радзіме быў шырокім светам
Усіх маіх вытокаў…
Адам Міцкевіч
Дзяржаўны музей гісторыі беларускай літаратуры сумесна з Баранавіцкім раённым выканаўчым камітэтам запрашае 29 верасня 2018 года ў Музей-сядзібу Міцкевічаў “Завоссе” на літаратурна-мастацкае свята “Адамаў шлях пад вечным небам”, прымеркаванае да 220-годдзя з дня нараджэння Адама Міцкевіча (1798–1855).
“Вялікае шчасце было нарадзіцца на гэтай зямлі…”, – так гаварыў Адам Міцкевіч пра Завоссе – месца, дзе ён нарадзіўся, дзе быў шчаслівы, месца, вядомае ў Беларусі і далёка за яе межамі.
Імя славутага земляка, слава і творчасць класіка сусветнай літаратуры яднае культурныя прасторы краін. Завоссе стала месцам сумеснай памяці суседніх з намі народаў, якія таксама лічаць Міцкевіча сваім нацыянальным паэтам, таму што месца ў гістарычнай спадчыне не патрабуе змены дзяржаўных меж, а наадварот, з’яўляецца добрай падставай для паразумення і дабрачыннасці. Адам Міцкевіч не дзеліць нас, а аб’ядноўвае, пашырае сяброўскае паразуменне народаў у культурным дыялогу.
У праграме свята:
- святочны канцэрт “Ёсць у мяне зямля, край светлых мрояў”;
- экскурсіі па Музеі-сядзібе Міцкевічаў “Завоссе”;
- выстава «“Дзяды” Адама Міцкевіча: гісторыя душы» Дзяржаўнага музея гісторыі беларускай літаратуры;
- літаратурна-грамадская акцыя “Чытаем класіка разам”;
- экспазіцыя твораў мастакоў Баранавіцкага раёна;
- непаўторнасць і прыгажосць работ майстроў народнай творчасці ў “Горадзе майстроў”;
- “Бібліятэчны марафон”, займальныя квэсты, гульні і заняткі на дзіцячай інтэрактыўнай пляцоўцы.
Месца правядзення: Брэсцкая вобл, Баранавіцкі раён, в. Завоссе.
Кантактны тэлефон: 334-56-21.
