MietNakcis: калядная вечарына
Пачатак: 20.12 (19:00)Этнакрама "Рагна"
Вось ужо ў трэці раз у менскай этна-краме “Рагна” пройдзе арганізаванае “Свайкстай” каляднае мерапрыемства – MietNakcis. Дзейства адбудзецца ў калядную пару – 20 снежня (пятніца). Пачнем а 7-й вечара.
Перш прэзэнтуем кнігу, выдадзеную ўвосень у “Бібліятэцы “Свайксты”, – пераклад з Ёнаса Трынкунаса, “Шлях старалітоўскай рэлігіі“. Адмыслова запрашаем да выказвання тых, хто ўжо прачытаў кнігу. Тыя, хто толькі хацеў бы займець, змогуць набыць кнігу па ніжэйшым, рэдакцыйным кошце.
Супольна пагутарым пра тутэйшых, балцкіх, старалітоўскіх багоў, а таксама пра шматстайнасць каляднай абрадавасці – пра разнастайнасць складнікаў вялікай каляднай містэрыі на Зімовы сонцаварот. Будзе і прамы абрадавы момант.
У другой палове вечарыны калядных песень запяюць гурты Dainava, Горынь, VolArt. Будзе адмысловых калядных страў, якіх мо’ нідзе больш, апроч як тут, і не пакаштуеце. Нечаканкі-сюрпрызы таксама будуць.
Назва імпрэзы, МéтНакціс, значыць “Ноч года“. Альбо MietNakcis, калі казаць на даўнейшай, балцкай гаворцы гэтай зямлі: metan – год, naktis – ноч. Згадайма словы менскага этна-культуролага С. Санько:
“Добра вядомае ў нашай традыцыi атаесамленне гадавых памiнальных дзён з адпаведнымi часткамi сутак. У паасобку, веснавыя памінальныя дні Фаміна тыдня называлiся “снеданнем па радзiцелях”, летнiя на Сёмуху адпаведна — “абед па радзiцелях”, а восеньскiя змiтраўскiя дзяды — “вячэра па радзiцелях”. Увесь шэраг прыпадабненняў “прачытваецца”: Вясна — Ранiца, Лета — Поўдзень, Восень — Вечар, Зiма — Ноч”.
Улічыце, клі ласка, тэхнічны момант. Прамы праход ад ст.м. “Фрунзэнская”, паўз “Мулен Руж”, да этна-крамы “Рагна” (вул. Сухая 4) з-за будаўніцтва новай станцыі метро цяпер закрыты. Таму калі будзеце ісці ад метро, дык на вуліцу Караля (а “Рагна” – на скрыжаванні вуліц Караля і Сухой) найлепш ісці, выйшаўшы з метро да “Еўраопта” (гэта ў накірунку руху цягніка з цэнтра, а ў пераходзе налева). Тады дваром выйдзеце на вул. Караля і, збочыўшы налева, 200 м пройдзеце да агароджы будоўлі, а там адразу і “Рагна”.
Падзеі ўкантакце і ў фэйсбуку, далучайцеся!
