Наста Кудасава прэзентуе кнігу «Маё невымаўля»
Пачатак: 07.06 (19:00)Літаратурны музей Петруся Броўкі
Літаратурны музей Петруся Броўкі (вул. К. Маркса, 30) запрашае 7 чэрвеня на прэзентацыю кнігі Насты Кудасавай «Маё невымаўля», якая пабачыла свет у серыі «Кнігарня пісьменніка» ў выдавецтве «Кнігазбор». Пачатак у 19.00. Уваход вольны.
“Маё невымаўля” – кніга, за якую я адчуваю вялікую адказнасць, — звяртаецца да шырокай публікі Наста. — Галоўны змест зборніка можна акрэсліць як перажыванні чалавека, закаханага ў жыццё і ў зямныя лёсы – лёс паэта, лёс жанчыны, лёс жука, сабакі, мядзведзя, сасны, ветру…
Гэта кніга – услухоўванне ў пяянне рыб і ўзрастанне дрэваў.
Гэта мой шлях углыб мовы, да першасных сутнасцяў словаў, і далей – да простага і няўлоўнага, да таго, што застаецца па-за мовай, між радкоў. У кнігу ўвайшлі выбраныя вершы, напісаныя ў апошнія пяць гадоў – вельмі нялёгкі ў маёй біяграфіі перыяд.
Але нягледзячы на боль, адзіноту і расчараванне я б хацела данесці чытачу веру ў галоўнае – веру ў любоў, якая разлітая паўсюдна і якая адзіная напаўняе наш свет сэнсам і прыгажосцю”.
