“Прайсці праз вернасць” да 100-годдзя з дня нараджэння Максiма Танка
Пачатак: 17.09 (19:00)Малая зала ім. Р. Шырмы
17 верасня 2012г. у дзень нараджэння Яўгена Іванавіча Скурко (псеўданім – Максім Танк) у Малой зале імя Р.Шырмы Белдзяржфілармоніі адбудзецца прэм’ера: літаратурна-музычная праграма, якую падрыхтавала вядомая артыстка, майстар мастацкага чытання, лаўрэат нацыянальнага і Усесаюзнага конкурсаў Зінаіда Феакцістава. «Прайсці праз вернасць» – такая назва праграмы.
Гэта радкі аднаго з белых вершаў Народнага паэта Беларусі, лаўрэата Дзяржаунай прэміі Максіма Танка, 100-годдзе якога мы адзначаем.
Рэжысёр-пастаноўшчык – вядомы дзеяч мастацтваў, дацэнт, загадчык кафедры рэжысуры Беларускай дзяржаўнай акадэміі мастацтваў Вітаўтас Грыгалюнас.
Гэта ўжо не першы сумесны творчы праект артысткі і рэжысёра. Слухачы помняць такія работы, як «Праз смех і слезы», «Ягадны хутар» (па творчасці Яўгеніі Янішчыц), «Белы камень» (па творчасці Аляксея Пысіна).
Пражыць жыццё і захаваць вернасць Айчыне, маці, каханай жанчыне, настаўнікам, сябрам, землякам уласціва далёка не кожнаму. Вы пачуеце самыя разнажанравыя творы М.Танка ад сур’ёзных да жартоўных. Гэта вершы-роздумы на розныя тэмы, пяшчотныя ўспаміны пра маці, метафарычныя, творы пра вайну, драматычныя і нават крыху іранічныя, пра адзёнае каханне паэта, яркія, бліскучыя байкі, гумарэскі.
Максім Танк вельмі любіў беларускія народныя песні, якія спявала яму яго матуля:
«Закалыхваючы,
Пэўна, стомленая,
Памылілася маці:
Не на верацяно,
А на сэрца маё
Сваю песню
Навіла.
Я і сёння асцярожна,
З хваляваннем
Разматваю
Клубок песень,
Каб хатя не парваць
Яе нітку».
Усіх, хто любіць сваю зямлю, высокае мастацкае слова, хто неабыякавы да вялікай літаратурнай спадчыны Максіма Танка запрашаем 17 верасня ў 19:00 у Малую залу Белдзяржфілармоніі на літаратурны вечар «Прайсці праз вернасць». Творы Максіма Танка ўзнясуць нас на вышыню духоўнага ачышчэння.
«Я спытаў чалавека,
Які прайшоў праз агонь,
І воды,
І медныя трубы:
– Што самае цяжкае
На гэтым свеце?
І ён адказаў:
– Прайсці праз вернасць».
Пачатак – 19.00
Білеты прадаюцца ў касах філармоніі і ўпаўнаважанымі па арганізацыі гледача
Даведкі па тэлефонах: 284 44 33, 284 32 02 (аддзел рэалізацыі білетаў); 331 36 91 (рэжысёры);
331 16 17, 284 47 09 (каса з 9.00 да 21.00)
