Прэзентацыя кнігі Этгара Керэта «Сем добрых гадоў»
Пачатак: 19.04 (15:00)галерэя «Лабірынт»
Пасольства Дзяржавы Ізраіль у Рэспубліцы Беларусь супольна з Нацыянальнай бібліятэкай Беларусі і выдавецтвам «Логвінаў» прадстаўляюць кнігу вядомага ізраільскага пісьменніка Этгара Керэта «Сем добрых гадоў».
20 красавіка 2016 г. а 15.00 у галерэі «Лабірынт» Нацыянальнай бібліятэкі адбудзецца прэзентацыя кнігі Этгара Керэта «Сем добрых гадоў» у перакладзе на беларускую. Прэзентацыя кнігі адкрые Дні Культуры Ізраілю ў Беларусі.
На мерапрыемстве будзе прысутнічаць аўтар – ізраільскі пісьменнік, “белы клоун сусветнай літаратуры” Этгар Керэт, чые кароткія апавяданні перакладзеныя на больш чым сорак замежных моваў.
Этгар Керэт нарадзіўся ў сям’і выхадца з Беларусі ў 1967 годзе ў ізраільскім горадзе Рамат-Ган. Вучыўся ў Тэль-Авіўскім універсітэце. Служыў у войску. Аўтар зборнікаў кароткай прозы: “Настальгія па Кісінджэры”, “Піцэрыя “Камікадзэ” і дзіцячай кнігі “Тата ўцякае разам з цыркам”. Кінасцэнарыст, аўтар кінафільма “Медузы” (2003). На беларускую мову перакладалася кніга яго выбраных апавяданняў “Кіроўца аўтобуса, які стаў Богам”, якая па выхаде набыла шырокую папулярнасць сярод чытачоў.
З нагоды візіта ў Беларусь Этгар Керэт кажа:
“Я вельмі ўзрушаны, што кніга выйдзе ў краіне, дзе нарадзіўся мой бацька. Калі бацька захварэў, дык пачаў усё больш і больш гаварыць пра мясціны свайго нараджэння і ўпершыню ў жыцьці выказаў спадзяванне, што я калі-небудзь туды прыеду. У наступным месяцы, праз чатыры гады пасля ягонай смерці, я ўпершыню прыеду ў Беларусь як пісьменнік. Калі б мой бацька мог пабачыць гэта, я ніколькі не сумняюся, што гэты мой візіт напоўніў бы яго радасцю і гонарам”.
Крыху пра “Сем добрых гадоў”. У сваёй першай непразаічнай кнізе Этгар Керэт піша пра важныя для яго рэчы, што адбыліся за гэты перыяд – ад нараджэння сына да смерці бацькі. У гэтых смешна-сумных перад чытачом паўстае панарама супярэчлівай рэчаіснасці – у Ізраілі і ў свеце, сёння і ўчора. Пра тое, як Этгараў бацька (родам з Баранавіч) па вайне купляў у італьянскай мафіі зброю для габрэйскага падполля ў Зямлі Ізраілю, пра тое, як маці выжывала ў гета, пра брата, актывіста легалайзу, які з’ехаў у Таіланд, і сястру, якая завяла ўльтраартадаксальную сям’ю з тузінам дзяцей; пра “Дом Керэта” – самы вузкі дом у Еўропе. Пераклаў кнігу з іўрыта і ангельскай Сяргей Шупа.
20 красавіка а 18.30 таксама адбудзецца літаратурная вечарына “Як напісаць кароткае апавяданне” з удзелам Этгара Керэта і Сяргея Шупы ў Галерэі Ў (пр. Незалежнасці, 37а). Уваход – вольны.
