Прэзентацыя новай кнігі Вольгі Гапеевай “Граматыка снегу”
Пачатак: 02.03 (19:00)Кнігарня логвінаЎ
2 сакавіка ў кнігарні “Логвінаў” а 19.00 адбудзецца прэзентацыя новай кнігі Вольгі Гапеевай “Граматыка снегу”
Вольга Гапеева – паэтка, пісьменніца, мыслярка, перакладчыца, лінгвістка. Аўтарка кніг “Няголены ранак”, “Прысак і пожня”, “Рэканструкцыя неба”, “Сумны суп” і інш. Стыпендыятка міжнародных праграм для пісьменнікаў і перакладчыкаў (Аўстрыя, Нямеччына, Латвія, Швейцарыя), удзельніца шматлікіх міжнародных канферэнцый і літаратурных фестываляў (Славенія, Германія, Чэхія, Швейцарыя, Польшча і інш.). Творы Вольгі Гапеевай перакладзеныя на больш як 10 моваў свету. Аўтарка супрацоўнічае з электроннымі музыкамі, выступае з аўдыёвізуальнымі перформансамі. Сябра беларускага ПЭН-цэнтра і Саюза беларускіх пісьменнікаў. Мае ступень кандыдата навук, дацэнт. Займаецца літаратурным перакладам, даследаваннямі ў галіне філасофіі мовы, кампаратыўнай лінгвістыкі, сацыялогіі цела. сайт – www.hapeyeva.org
“Граматыка снегу” – пятая паэтычная кніжка Вольгі, якая выйшла ў лютым 2017 г. у выдавецтве “Галіяфы”.
Снег, рэальны і метафізічны, паэзія і сама аўтарка – стануць асноўнымі тэмамі размовы, да якой таксама далучацца Валянціна Аксак, Віктар Жыбуль, Вольга Бабкова і Валянцін Акудовіч. Мадэратар – Віталь Краўчанка.
Новая кніга Вольгі Гапеевай пашырае межы ўсведамлення штодзённасці, дзе словы і значэнні ўглядаюцца адно ў адно ў надзеі пазбегнуць самоты. Гэта своеасаблівая граматыка ўзаемін чалавека з сусветам праз мову. Сімвалічнасць снегу, якая пранізвае кнігу наскрозь, выклікае бязмежнасць інтэрпрэтацый паэзіі Вольгі Гапеевай.
Імпрэза адбываецца ў межах кампаніі “Будзьма беларусамі!”
Уваход вольны
