“Прывітанне, Мама Му!”: Круглы стол «Перспектывы развіцця дзіцячай літаратуры ў Беларусі»
Пачатак: 30.10 (16:00)кнігарня "логвінаЎ"
30 кастрычніка ў 16.00 – Круглы стол «Перспектывы развіцця дзіцячай літаратуры ў Беларусі» ў кнігарні «Логвінаў» (пр-т Незалежнасці, 37а)
28-30 кастрычніка 2015 года Пасольства Швецыі пры падтрымцы Савета па культуры Швецыі ладзіць у Мінску і Віцебску цыкл сустрэч з выбітнай дзіцячай пісьменніцай Юяй Вісландэр, аўтаркай сусветна вядомай серыі казак пра Маму Му і Крумкача.
Падчас сустрэчаў шведская пісьменніца пазнаёміць маленькіх чытачоў з новай кніжкай «Мама Му ў басейне», якая пабачыла свет па-беларуску дзякуючы супольным намаганням перакладчыцы Надзеі Кандрусевіч і выдавецтва «Логвінаў». Падарункам для дзетак стане таксама выступ лялечнага тэатрыка «Лямцавая батлейка», які прапануе сваю версію новай кніжкі пра прыгоды незвычайнай кароўкі і яе вясёлага сябра крумкача. Завершыць мерапрыемства невялічкі майстар-клас, на якім дзеткі самі зробяць сувенірчык на памяць пра цікавае знаёмства. Сустрэчы адкрые Пасол Швецыі ў Рэспубліцы Беларусь Марцін Оберг, а напрыканцы кожны, хто пажадае, зможа ўзяць аўтограф у Юі Вісландэр і сфатаграфавацца з яе цудоўнымі персанажамі.
У рамках візіту шведскай пісьменніцы адбудзецца таксама круглы стол, прысвечаны перспектывам развіцця дзіцячай літаратуры ў Беларусі, у якім возьмуць удзел беларускія дзіцячыя пісьменнікі, перакладчыкі і выдаўцы.
