Восеньскі фэст “Багач”
Пачатак: 21.09 (12:00)Дзяржаўны літаратурны музей Янкі Купалы
21 верасня 2013 года Студэнцкае этнаграфічнае таварыства і Дзяржаўны літаратурны музей Янкі Купалы запрашаюць у Вязынку адзначыць традыцыйнае восеньскае свята Багач. Пачатак – а 12:00.
У беларускім календары Багач прымеркаваны да заканчэння збору ўраджая (“к гэтаму часу ў кожнага ўсяго багата”) і першаму запальванню хатняга агменю – васковай свечкі ў лубке з жытам, якую ставяць на покуць і захоўваюць там на працягу ўсяго года, што прыносіць у дом багацце і шчасце.
На свяце выступяць спеўныя і інструментальныя гурты, такія як Варган, Горынь, Dainava, Guda, Кудмень, Рада, капэля На Таку, дуэт Васіля Грыня разам з Юліяй Літвінавай, а таксама дуэт Рамана Яраша і Юліі Літвінавай і іншыя. Адмысловым госьцем будзе аўтэнтычны гурт з Гарадзеншчыны.
Для дзяцей і дарослых пройдуць разнастайныя майстар-класы па рамёствах. Таксама будзе працаваць гульнявая пляцоўка, кірмаш. Можна будзе пакаштаваць стравы традыцыйнай кухні, сапраўдны хлеб і натуральны мёд, патанцаваць народныя танцы. Акрамя гэтага, мы плануем арганізаваць да свята шэраг іншых прыемных нечаканасцяў.
Нам хацелася б, каб гэтае свята стала для яго ўдзельнікаў і гасцей не толькі месцам выдатнага адпачынку на вольным паветры, але і пляцоўкай для жывога творчага ўзаемадзеяння, у працэсе якога толькі і можа захоўвацца і перадавацца традыцыя.
Як даехаць: электрычка з Менску едзе ў 10.50, прыбывае ў Вязынку ў 11.42. Назад з Вязынкі можна ехаць у 16.07, 16.45, 17.57.
Удзел у сьвяце вольны, але для ўваходу на тэрыторыю музея трэба будзе купіць квіток (10 000 руб., студэнтам — 7000, школьнікам — 5000 руб.)
З пытаннямі звяртайцеся на нумар +37529 8425789 (Наста)
Сустрэчы ў сац. сетках:
https://www.facebook.com/
