3 і 4 красавіка ў Мінску пасля перапынку ў год прайшоў тыдзень моды. Летась праз эпідэмію і палітычную сітуацыю ў краіне паказы былі немагчымыя. Сёлета за новымі калекцыямі моднікі сачылі анлайн. «Наша Ніна» вылучыла асноўныя трэнды ад айчынных дызайнераў.
Звычайна вясной прэзентуюць адзенне на восень-зіму, але на беларускім тыдні адышлі ад гэтых умоўнасцяў і паказалі калекцыі на цяперашні і наступны сезон.
Сафары
Nelva
Стыль адзення паляўнічых і археолагаў даўно палюбіўся модніцам за яго зручнасць і ўніверсальнасць. Дадаць атласную хустку ці туфлі-лодачкі — і атрымаеце элегантны вобраз, кеды і панаму — кэжуал-варыянт. Класічнае сафары мае на ўвазе пясочны колер, але дызайнеры прапануюць таксама новае прачытанне — у блакіце.
Пастэль
Buter, Nelva, Buter
Пяшчотна-ружовы, персікавы, малочна-блакітны... Калі хочацца, каб вясна з квітнеючымі садамі заўсёды была з табой, вы ведаеце, што абраць.
Трансфармацыя беларускага касцюму
LSD Clothing
Беларускі строй — гэта не толькі вышыванкі. Гэта яшчэ і асаблівы крой і прапорцыі. Брэнд LSD Clothing, вядомы стылёвымі касухамі з эка-скуры, прадставіў сваё бачанне культурнага коду. «Рупліва вывучыўшы архівы, я акуратна прэпарыравала касцюм, перасабраўшы яго ў сучасным ключы. Андарак, кашуля, фартух перанесліся ў 21 стагоддзе, знайшоўшы новае жыццё ў актуальных сілуэтах і тканінах», — тлумачыць задуму крэатыўны дырэктар брэнда Дар’я Лебедзева.
Пэчварк
Tanya Tur, Kastrama, Davidova
Трэнд на лапікавае шыццё прарочаць і сусветныя подыумы — яркія мадэлі мільгалі, напрыклад, на паказе Chloé ў Парыжы. Прычын такой увагі да рукадзелля можа быць некалькі: гэта і імкненне да экалагічнай вытворчасці, і жаданне разнастаіць будзённы гардэроб нестандартнай і эксклюзіўнай рэччу.
Высокае мастацтва
Buter, Key-to-art, Natalia Korzh
Галоўнай карцінай мінулага года стала «Ева» Хаіма Суціна. Рабіць адсылкі да яе цяпер — палітычнае выказванне. Дый хваля сышла. Таму дызайнеры натхняліся іншымі творамі. Рэнесанс, ар-дэко, супрэматызм — паход у такім уборы ў музей ці культурную імпрэзу нібыта нямакае, што вы ў кантэксце.
Раслінны прынт
Loverani, Natalia Korzh, Nelva
Без сукенак у кветкі не абыходзіцца ніводны сезон вясна-лета. Апроч прынту, звярніце ўвагу на аб’ёмныя рукавы — яшчэ адна тэндэнцыя, якая палюбілася дызайнерам і гучна вярнулася ў моду.
Каляровыя футры
Davidova, Davidova, T. Efremova
Узімку беларусы звычайна пераходзяць на цёмныя колеры. Але ў наступным халодным сезоне дызайнеры прапануюць перагледзець гэты падыход і аддаць перавагу яркай гаме. Застацца незаўважным у такім футры немагчыма, таму перш чым апрануць яго, сачыце за навінамі.
Неонавыя колеры
Davidova
Для тых, хто хоча адчуць сябе гераіняй мультфільма і сумуе па пазітыўных эмоцыях, натхненнем стане калекцыя Марыны Давыдавай. Калі няма настрою — стварай яго сам.
Сукенка для русалкі
Tamara Harydavets
Калі і быць каралевай, то марской. Бліскаўкі, перламутр, луска... Дызайнер Тамара Гарыдавец паказала, што серабрыстыя сукенкі могуць сабе дазволіць не толькі дзяўчаты, але і кабеты ў паважным узросце.
Плеценыя сумкі
Варыянт для расслабленага шпацыру па горадзе ці курортным узбярэжжы. Можна спалучаць як з лёгкімі пастаральнымі сукенкамі, так і з джынсамі.
Фота арганізатараў BFW
