Праца, аўтобусы, тэлебачанне… Тое, без чаго не ўяўляецца жыццё сучаснага чалавека. Простае такое, спажывецкае шчасце. Але нельга заўсёды жыць аднолькава: праца стамляе, размовы падаюцца непатрэбнай мітуснёй… Самаадчуванне наўпрост залежыць ад ладу жыцця. Калі жыць нецікава, то і галава баліць. Асобныя людзі здзіўляюць сваёй энергіяй і колькасцю розных справаў, якімі займаюцца. “Які цікавы чалавек!” А ён не адзін. У яго ёсць аднадумцы і паплечнікі.
Грамадcкія арганізацыі, што займаюцца нефармальнай адукацыяй моладзі і дарослых, распрацавалі свае праекты, якія і былі прадстаўленыя на “Тыдні нефармальнай адукацыі”, ужо пятым па ліку. На працягу тыдня ладзяцца трэнінгі, семінары, прэзентацыі. Там распавядаюць пра экалогію і эколагаў, пра тое, як, дзе і з кім вандраваць, як можна з дапамогай інтэрнэта ўладкавацца на працу; дзеляцца сваімі поглядамі на горад…
Адрозненне нефармальнай адукацыі ад звычайнай, школьнай альбо універсітэцкай, у тым, што яна не з’яўляецца абавязковай. Туды прыходзяць людзі, якія шукаюць цікавага і новага. Вышэйшая адукацыя ў нас зрабілася прэстыжнай. У той жа час шмат каму яна не прынесла ні добрай працы, ні асабістага шчасця. Набытыя курсавыя ляжаць на палічках ва універы, а дыплом пакрыўся пылам.
Стасункі з людзьмі грамадска-актыўнымі паспрыяюць змене жыццёвую пазіцыю на больш актыўную. Падаецца, што для большай колькасці справаў патрэбна больш энергіі, але яе звычайна не стае. З іншага боку, задавальненне ад зробленага прыносіць тую самую энергію.
У чалавеку ўсё мусіць быць гарманічна, і гэта натуральны стан. Толькі не трэба супраціўляцца гэтаму. Дыханне, харчаванне, рух, эмоцыі – усё ўзаемазвязана. Калі паміж гэтымі рэчамі ёсць, тады чалавек будзе сябе адчуваць добра. Пра гэта распавялі 24 верасня на прэзентацыі праекту “Будзь здаровы, будзь шчаслівы!” адукацыйнага цэнтра “Ратрыс”. Прэзентацыя прайшла ў межах тыдня нефармальнай адукацыі.
У невялічкай залі – майстэрні мастакоў – увечары сабраліся людзі, збольшага маладыя. Вядоўца, Сяргей Завалокін, распавядаў пра ідэі, якія ўтвараюць падставы дзейнасці цэнтра і правядзення курсаў “Будзь здаровы, будзь шчаслівы!”. Пасля абмяркоўвалі праблемы правільнага харчавання, эмацыйнай перагружанасці ці, наадварот, голаду, сучаснага чалавека. Курсы будуць доўжыцца тры месяцы.
“Ратрыс” – абрэвіятура. Расшыфроўваецца як “развіваючыя трэнінгі і семінары”. У Беларусі гэты цэнтр існуе ўжо цягам году, а ў Расіі, у Санкт- Пецярбургу, – 3 гады. Мэта дзейнасці цэнтра – даць людзям магчымасць змяніцца да лепшага псіхалагічна і фізічна, у пэўным сэнсе пераадолець сябе, каб зрабіцца больш шчаслівым: навучыцца прыгожа размаўляць, стасавацца з людзьмі…
Сяргей Завалоскін, вядоўца курса:
– Мы займаемся адукацыяй і жадаем, каб чалавек неяк вырашаў свае праблемы, а не заставаўся нашым сталым кліентам.
Сяргей Завалоскін, вядоўца курса
Наталля Гаўрыленка, дырэктар цэнтра:
– Ідэя тыдня нефармальнай адукацыі і нашага цэнтра у чымсьці супадаюць: развіццё чалавека для паляпшэння яго жыцця.
Наталля Гаўрыленка, дырэктар цэнтра
Мэта падобных семінараў – даць чалавеку магчымасці выбіраць жыццё і паказаць, наколькі розным і прыемным можа яно быць.
