5 снежня сканчаецца набор на курсы Лятучага ўніверсітэта і ў Школы Магістраў Гульні.
У гэтым годзе ў адукацыйнай праграме Лятучага ўніверсітэта значныя інавацыі. За пяць гадоў працы мы атрымалі не толькі вялікі досвед і шырокае кола слухачоў. Усе гэтыя гады мы знаходзіліся ў пошуку новага зместу адукацыі, які адпавядае ідэі сучаснага Універсітэта. У гэтым накірунку мы пільна ўглядаемся ў феномен “гульні”.
Мы гуляем ва Універсітэт, мы будуем яго як сваю прастору мыслення, якая дазваляе ствараць новыя сэнсы, шукаць адказы на падставовыя пытанні.
Дадатковую ступень у структуры адукацыі Лятучага ўніверсітэта створаць Школы Магістраў Гульні.
Мы ведаем Magister ludi з твораў Германа Гесэ. У Касталіі магістры стваралі новую культуру, якая б магла пераадольваць стан “фельетоннай эпохі”. І фантастычнай Касталіяй гэты пошук не скончаны. Сёння нам у Беларусі трэба знайсці сваё рашэнне, сваю форму мыслення і ладу жыцця.
Школы Магістраў Гульні разлічаны на невялікія групы, якія ў шчыльнай камунікацыі з Настаўнікамі – беларускімі мыслярамі і інтэлектуаламі – будуць супольна займацца інтэлектуальнай працай.
Усе Школы разлічаны на два з паловай гады: са студзеня 2016-га па травень 2018-га года.
Кожная з іх прадугледжвае сваю праграму, якая будзе ўключаць як засваенне агульных курсаў Лятучага, так і працу ў індывідуальных фарматах, асабістых для кожнай школы.
Увага! Вы можэце стаць удзельнікам толькі АДНОЙ з школаў!
-
Школа Гісторыі ідэяў разгарне выбудову інтэлектуальнага кантэксту, звязкі традыцыі і сучасных умоваў мыслення на памежжы гісторыі філасофскай думкі, інтэлектуальнай і культурнай гісторыі.Кіраўнік Школы – Ігар Бабкоў
-
Метадалагічная школа прапануе засваенне, развіццё і практыкаванне сучасных формаў супольнага мыслення і выбудовы будучыні праз практыку і развіццё ідэяў. Кіраўнікі Школы – Уладзімір Мацкевіч, Тацяна Вадалажская
-
Школа ВКЛ звернецца да спадчыны, каб пераўтварыць веды пра мінуўшчыну ў актуальны жывы падмурак цяперашняга самаразумення, культуры і пабудовы будучыні. Кіраўнік Школы – Алег Дзярновіч.
-
Школа сацыяльна-філасофскай аналітыкі паглыбіцца ў выбудову сацыяльнага ўяўлення пра беларускае грамадства, стварэнне тэкстаў, у якіх схопліваецца сучаснасць. Арганізатары Школы – супольнасць “Беларускай Філасофскай прасторы”
Каго мы чакаем у Школы Магістраў Гульні?
Кожная Школа вызначае сваё кола адмыслоўцаў, якім прапануецца “прасунуты” узровень і супраца ў вызначаным накірунку.
Агульнымі патрабаваннямі з’яўляюцца амбіцыі і гатоўнасць да новага тыпа адукацыі. Вам спатрэбіцца развітае ўяўленне, каб ствараць новыя сэнсы і практыкі; устаноўка “Думаць Беларусь” (накіраванасць на “практыку мыслення” і “практычнае мысленне”); вольны час і лад жыцця, які дае магчымаць ставіць вялікія задачы; арыентаванасць на прыняцце ідэяў і прынцыпаў супольнага стварэння новага Універсітэта.
Як трапіць?
“Школы Магістраў Гульні” прадугледжваюць фармаванне невялікіх працоўных груп. Кожная Школа будзе праводзіць набор па асабістых крытэрах, звязаных з тэматыкай і адпаведным тыпам інтэлектуальнай практыкі. Пасля падачы заяўкі з Вамі звяжацца адміністратар і прызначыць час сумоўя.
Што ў выніку?
Заканчэнне Школы будзе адзначацца стварэннем індывідуальнай ці групавой працы, якая прадэманструе здольнасць да самастойнай творчай інтэлектуальнай практыкі і дазволіць чальцам калегіюма Лятучага ўніверсітэта назваць выпускнікоў калегамі. У выніку паспяховага заканчэння Школы выпускнікам будзе наданы тытул “Магістар Гульні”, што запачаткуе новую генерацыю мысляроў і стваральнікаў Беларусі.
У новай праграме Лятучага ўніверсітэта застаецца таксама і ўжо традыцыйны адукацыйны фармат –
курсы, якія ствараюць прастору для індывідуальнага руху па вольнай траекторыі.
Першы ўзровень адукацыі дае магчымасці для засваення розных падыходаў у мысленні, гуманітарных і інтэлектуальных практыках, знаёмства з актуальнымі і ўнікальнымі напрамкамі сучаснай беларускай думкі, пошуку свайго Настаўніка.
У гэтым годзе плануецца восем курсаў. Яны прадстаўляюць арыгінальныя беларускія філасофскія канцэпцыі, а таксама прапануюць разабрацца з метадамі працы з мінулым і традыцыяй – як інтэлектуальнай, так і стылёвай. Асобную групу ствараюць курсы, у якіх будзе адбывацца герменэўтычная праца з тэкстамі, якія задаюць падмурак беларускай і еўрапейскай культуры.
Курсы будуць адбывацца са студзеня па чэрвень 2016 года.
-
Мысленне. Ад філасофскага здумлення да практычнай катэгарычнасці (У.Мацкевіч)
-
Майстэрня Свамовы: Мысьліць па-беларуску (М.Баярын)
-
Праца з мінулым. Шлях гістарыяграфіі (Г.Сагановіч)
-
D4: Вобраз і стыль (М.Анемпадыстаў)
-
Гісторыя беларускай думкі ў кантэксце еўрапейскага мыслення (І.Бабкоў)
-
Школа Бібліі (І.Дубянецкая)
-
Тэхнікі сімбалічнай інтэрпрэтацыі (П.Баркоўскі)
-
Глабальныя праблемы паўсядзённасці. Актуальныя дыскусіі ў еўрапейскай супольнасці (В.Бабровіч)
Гэтыя курсы адкрыты для ўсіх, хто шукае новых сэнсаў, мае пытанні і праблемы, гатовы да зменаў у сабе і ў свеце. Узрост, адукацыя і прафесія не маюць абмежаванняў. Здольнасць да ўдзелу вызначаецца гатоўнасцю да супольнага мыслення і адпаведнасцю ўзроўню, які задае выкладчык.
Каб трапіць на курсы, трэба падаць заяўку. Заяўляцца можна на любую колькасць курсаў, пры гэтым варта разлічваць свае фізічныя і інтэлектуальныя сілы і магчымасці.
Па заканчэнні курсаў вы не атрымаеце дыпломаў ці пасведчанняў. Але вы зможаце знайсці Настаўніка ці “сваё кола”. Гэтая праца можа стаць важным крокам у Вашай жыццёвай ці адукацыйнай траекторыі. Тое, што Вы атрымаеце, – ёсць абсалютна Ваш здабытак і залежыць ад Вашай адказнасці і магчымасці скарыстацца ўмовамі і асяродкам для развіцця.
Калі Вы жадаеце ўзяць удзел у новай праграме Лятучага ўніверсітэта, неабходна падаць ЗАЯЎКУ да 5 снежня.
Больш падрабязна даведацца пра новыя магчымасці адукацыйнай праграмы можна будзе падчас прэзентаціі праграмы, якая адбудзецца 13 лістапада.
Трохі перафразуючы Джулію Пеймон-Джонс, можна сказаць, што “думаць пра непамыснае і рабіць неверагоднае – гэта вялікая прывілея”.
Гэта прывілея маладосці, якая яшчэ не заціснута ў “дарослыя” рамкі таго, што магчыма і немагчыма.
Гэта прывілея свабодных людзей, якія могуць дазволіць сабе “зрабіць усё не так”.
Гэта прывілея спозненых, калі лепш распачаць новае, чым даганяць. Гэта прывілея рэфлексіўных, якія бачаць крызу
існуючага і гатовы “паставіць” на тое, што можа прыйсці замест.
Гэта прывілея амбітных.
Да сустрэчы!
