Каб візіт Папы ў Беларусь адбыўся, Ватыкан павінен пераканацца, што яго прыезд будзе ўсімі аднолькава станоўча ўспрыняты, заявіў у эксклюзіўным інтэрв’ю БелаПАН апостальскі нунцый у Беларусі арцыбіскуп Габар Пінтэр.
«Візіт Папы — з’ява, якая павінна прымнажаць любоў, гармонію, мір, усё самае станоўчае, што можа прачуць абсалютна кожны чалавек у гэтай краіне — не толькі каталікі, але і ўсе іншыя хрысціяне, мусульмане, атэісты і гэтак далей, — падкрэсліў дыпламат. — Гэта павінна быць з’явай, што ўмацоўвае братэрства людзей, але не павінна быць чымсьці, што можа раздзяліць людзей, з-за чаго могуць узнікнуць канфлікты і нязгода».
«Я ведаю, што паміж людзьмі рознай веры ў Беларусі гістарычна панаваў мір і гармонія. Але Папа, калі ён наведае Беларусь, прыедзе не проста як прыватная асоба або біскуп Рыма. Ён з’яўляецца кіраўніком дзяржавы, суб’ектам міжнароднага права, таму яго візіт у любую краіну свету мае міжнародны кантэкст», — сказаў Пінтэр. Толькі пасля таго як будзе ўладжанае гэтае пытанне, можна будзе пераходзіць да тэхнічных дэталяў арганізацыі візіту, дадаў кіраўнік дыпмісіі Святога пасаду.
«Як я ўжо заяўляў, для мяне гэты візіт з’яўляецца прыярытэтнай задачай, — падкрэсліў ён. — Я ведаю, наколькі важная гэтая падзея для краіны, каталіцкага касцёла, беларусаў у цэлым і нават для ўсяго Усходне-Еўрапейскага рэгіёна. Для мяне прыярытэтам з’яўляецца рабіць усё, што ў маіх сілах, каб гэты візіт адбыўся. Мы працуем над гэтым пытаннем разам з беларускім урадам і ведамствамі Ватыкана».
Арцыбіскуп Пінтэр сказаў, што яму ўжо даводзілася займацца арганізацыяй прыёму пантыфіка. «Я быў у Парыжы, калі Папа Бенедыкт павінен быў прыехаць у Францыю, у мяне ёсць вопыт у гэтай, трэба сказаць, нялёгкай справе, якая тэхнічна займае не менш за паўгода. Але мяне не палохае гэтая перспектыва, я рады ёй», — запэўніў ён.
Апошні раз Габар Пінтэр сустракаўся з Папам Францыскам у пачатку жніўня 2016 года, за два тыдні да свайго прыезду ў Беларусь, яны шмат гаварылі пра Беларусь.
«Папа нагадаў пра сваю сустрэчу з беларускім прэзідэнтам і ўсе тыя пытанні, якія яны тады абмяркоўвалі. Папа казаў мне пра сваю асаблівую любоў да каталіцкага касцёла ў Беларусі. Ён вельмі добра ведае, што беларускія каталікі ў мінулым многае перажылі. Мы размаўлялі з ім аб тым, якія шчырыя ў Беларусі вернікі. Пантыфік з вялікай радасцю адгукнуўся аб той актыўнасці, якую праяўляе касцёл у Беларусі, а таксама аб добрых адносінах паміж касцёлам і праваслаўнай царквой у гэтай краіне», — сказаў дыпламат.
