На белым Ford Kuga працягвае ездзіць па краіне краіне Другі фестываль беларускамоўнай рэкламы і камунікацыі AD.NAK! Пасля паспяхова рэйду ў заходнюю Горадню фэст выправіўся на ўсход краіны, у Магілёў, дзе 3 лістапада адбылася Другая прэзентацыя фестывалю. Авангард рэкламных сіл Падняпроўя сабраўся за круглым сталом гатэля “Магілёў”, каб азнаёміцца са здабыткамі айчыннай рэкламістыкі і не толькі.
Семінар-прэзентацыя праходзіў у разняволенай, амаль хатняй атмасферы. З цікавасцю праслухаўшы прэзентацыю фестывалю ад Сяргея Скарахода, публіка перайшла да дакладу Андрэя Эзерына. Абмеркаванне сацыяльных сетак у жыцці і бізнэсе стала адной з самых гарачых тэм. Вы не ведаеце падрабязнасцяў прыватнага жыцця Цукерберга ці як паспяхова рэкламаваць продаж дзвярэй у “Аднакласніках”? Прыходзьце на нашы рэгіянальная семінары, там можна даведацца! Ваш найбліжэйшы шанец – Берасце.
- Ніна Шыдлоўская, Андрэй Эзерын, Алена Макоўская, Сяргей Скараход
Кава-брэйк дазволіў выступоўцам і гасцям зблізіцца і больш падрабязна абмеркаваць узнятыя ў дакладах тэмы, а таксама пагутарыць з журналістамі, якіх гэтым разам было нямала. Выступоўцы адказалі на пытанні мясцовай прэсы, падзячылі партнёрам фестывалю (ў Магілёве – кампанія “Прыгожыя рашэнні”, галоўны партнёр – “Атлант-М Вест” ) і запрасілі ўсіх перайсці да другой паловы.
- Сяргей Скараход падчас кава-брэйку расказвае пра фестываль
А перайсці было да чаго. Традыцыйны хіт-парад найлепшых сусветных відэаролікаў ад Сяргея Скарахода і Надзеі Мурашка (www.marketing.by) прадэманстраваў, дзе, як і наколькі смешна, якасна і з цікавай сюжэтнай лініяй робяць сучасную рэкламу ва ўсім свеце. Пасля ўроку рэкламнай геаграфіі можна было смела вяртацца на Радзіму – да прэзентацыі кампаніі “Будзьма беларусамі”, якую пакідалі, як кажуць, “на салодкае”.
Ніна Шыдлоўская і Алена Макоўская расказалі пра “Будзьма беларусамі!” і пра тое, як кампанія прайшла трохгадовы шлях ад грамадскай ініцыятывы да пазнавальнага культурніцкага брэнда з дапамогай самых сучасных дасягненняў рэкламістыкі. Апошнім пытаннем вечара стала пытанне пра тэрмін стварэння аднайменнага анімацыйнага фільма кампаніі. 8 месяцаў, адказалі выступоўцы, але гэта без “НДС” (ідэй і канцэпцыі), з імі – увесь год. Пасля чаго яшчэ раз, на біс, гэты ж мульт і паглядзелі ды перайшлі да неафіцыйнай часткі з келіхам шампанскага і развагамі пра заходне- і ўсходнебеларускую рэкламістыку.
- Алена Макоўская
Алесь Плотка, фота – Аляксандр “Tarantino” Ждановіч
