Другі год пандэміі выкліканага новым каранавірусам захворвання COVID-19 можа апынуцца больш цяжкім для чалавецтва, чым першы, піша Звязда. Такое меркаванне выказаў падчас сеансу пытанняў і адказаў у Twitter Сусветнай арганізацыі аховы здароўя (СААЗ) дырэктар яе праграмы па надзвычайных сітуацыях Майкл Раян, паведамляе ТАСС.
«Мы ўступаем у другі год [пандэміі], і ён можа апынуцца нават больш цяжкім, улічваючы дынаміку распаўсюджвання [каранавіруса]», — канстатаваў ён.
Раян звярнуў увагу на той факт, што сведчанні, якія паступілі ў СААЗ за апошнія два тыдні, кажуць пра тое, што захворванне «зноў дасягнула піка». За апошні тыдзень у свеце было зарэгістравана каля пяці мільёнаў новых выпадкаў інфікавання каранавірусам і больш за 85 тыс. смяротных вынікаў. Пры гэтым на Паўночную і Паўднёвую Амерыку прыпадае больш за палову ўсіх тых, хто захварэў у свеце за сем дзён, а на рэгіён Еўропы — больш за траціну. Рост захворвання зарэгістраваны таксама ў Заходне-Ціхаакіянскім рэгіёне, Афрыцы і Усходнім Міжземнамор’і.
У Паўночным паўшар’і назіраецца пандэмічны «ідэальны шторм», падкрэсліў Раян, адзначыўшы «камбінацыю фактараў, якія прывялі да ўзмацнення перадачы інфекцыі ў многіх краінах». Гэта, у прыватнасці, навала людзей унутры памяшканняў ва ўмовах халоднага сезона. Акрамя таго, у некаторых дзяржавах, уключаючы Вялікабрытанію і Ірландыю, цыркулююць новыя штамы каранавіруса, якія, «безумоўна, спрыяюць перадачы» інфекцыі. Такім чынам, цяпер дзейнічаюць тыя ж «драйверы» распаўсюджвання віруса, што і ў мінулым годзе, але да іх дадаліся новыя, канстатаваў дырэктар СААЗ.
