Увечары 4 красавіка ў мінскай «Акадэмкнізе» адбылася аўтограф-сесія Пятра Васючэнкі з нагоды выхаду рамана-казкі з новымі авантурнымі гісторыямі пра знакамітых паноў Кубліцкага ды Заблоцкага. Кніга пабачыла свет у серыі «Каляровы ровар» Саюза беларускіх пісьменнікаў у выдавецтве «Кнігазбор».
Пятро Васючэнка
Першая кніга пра гэтых персанажаў выйшла ажно ў 1989 годзе. Аўтар кажа, што ўсе ягоныя казкі, як ранейшыя, так і новы раман-казка, адрасаваныя шырокаму колу чытачоў, літаральна ад 0 да 99 гадоў. Падобна на праўду: у чарзе па аўтограф можна было пабачыць і двухгадовага хлапчука, і падлеткаў, і дарослых, і сталых людзей. Пабачыцца з Пятром Васючэнкам прыйшлі і яго калегі-пісьменнікі: Наталля Бучынская, Алена Масла, Кастусь Цвірка.
Ілюстрацыі да рамана-казкі зрабіла Крысціна Баранава, якая таксама ўзяла ўдзел у сустрэчы. Спадар Пятро мяркуе правесці вялікую прэзентацыю «Дзівоснага лета паноў Кубліцкага ды Заблоцкага». Сачыце за абвесткамі на нашым сайце! А пакуль гэтая прыгожая, вясёлая і разумная кніга чакае вас на паліцах беларускіх крамаў.
Глядзець фотарэпартаж цалкам
Тэкст і фота: Віка Трэнас, для lit-bel.org
