Арт-пікнік FSP X, які ў гэтым годзе адзначае 10 гадоў, аб’яўляе поўны музычны лайнап. На 5 сцэнах фестывалю 15 еўрапейскіх і беларускіх музыкаў новага часу выступяць на фестывалі ў парку Dreamland 28-29 ліпеня.
Калі нехта яшчэ не ведае пра хэдлайнераў FSP X, час запомніць іх імёны: Луна, Pompeya, «Пасош» і Warhaus. Але сёння мы раскажам пра тых, хто складуць ім кампанію: выканаўцы са звар’целым міксам жанраў, сярод якіх можна знайсці і indie, і idm, і experimental, post-rock, які ўжо трапіў у зборнікі класічных мемаў пра музыку. Моцнае і чыстае гучанне кожнага музыкі забяспечыць легендарны брэнд JBL – музычны партнёр FSP.
Антыкварныя зубы Кашпіроўскага (Antikvariniai Kašpirovskio dantys). Бесшабашны кабарэ-аркестр
З Літвы пры падтрымцы Пасольства Рэспублікі Літва ў Беларусі прыедуць вар’яцкі кабарэ-аркестр, які сабраў лепшае ад Gogol Bordello і Dakh Daughters, і псіхадэлічныя Garbanotas Bosistas. Першыя ў гонар 100-годдзя Незалежнасці Літвы будуць падрываць мозг відэашэрагам з рэальным Кашпіроўскім, пускаць усіх ў скокі сваёй музыкай у лепшых традыцыях кабарэ-бэндаў і надоўга пакінуць у галаве рэфрэн «Į Venesuelą».
Garbanotas Bosistas. Самыя модныя гітары Літвы.
Адыграюць сэт псіхадэлічнага року ў духу 60-х. Робяць яны гэта настолькі стыльна, што нагадалі мэнэджару Pink Floyd Пітэру Джэннеру яго ўласных падапечных. Garbanotas Bosistas збіраюць у Літве поўныя залы зусім без прамоўшна і ўжо адзначыліся на Europavox (Францыя), MENT (Славенія), Liverpool Sound City (Вялікабрытанія), Reeperbahn (Германія).
“Петля Пристрастия”. Легенды беларускай музыкі
“Петля Пристрастия” ў прадстаўленні не мае патрэбы – іх змрочныя тэксты і бадзёрая танцавальная музыка ўжо 15 гадоў ліха змешваюцца ў песнях і збіраюць залы ў Беларусі, Расіі, Украіне і Балтыі.
Man Duo. Музычнае прывітанне з космасу.
Фінскія прадзюсары Jaakko Eino Kalevi (Domino / Beats In Space, ужо знаёмы гледачам па мінулым FSP) і Long-Sam пад агульным імем Man Duo рыхтуюць для FSP сэт касмічнай танцавальнай электронікі, уключаючы трэкі новага альбома, які выходзіць у свет акурат 22 чэрвеня.
Shuma. Электронныя шаманы
Працягваць танцы будзе праект Shuma, які альбом за альбомам вучыць Беларусь быць бліжэй да каранёў і рухацца пад гіпнатычную этна-электроніку.
Бакей. Маладосць, біты, хіп-хоп
За беларускі рэп, без якога лайнап мінскага фестывалю не можа лічыцца поўным гэтым летам, адказвае Бакей. Эксперыменты з хіп-хопам, рамантычнымі тэкстамі і электроннымі бітамі дазволілі Бакею да 22-х гадоў выступіць на Tallinn Music Week, з’ездзіць у тур па Беларусі, сабраць Re:Public і выпусціць чатыры альбомы.
Grisly Faye. Бязважкая электроніка лясных эльфаў.
Электронны праект з Украіны Grisly Faye выступае ў лясах, гарах і камерных залах Украіны, Германіі, Чэхіі і Польшчы. Лёгкая і эфемерная музыка Grisly Faye гучыць так, як быццам вы эльф, і лета ніколі не скончыцца.
Аня Жданава. Меладычны летуценны поп родам з касетнага дзяцінства.
Летняга настрою дадасць Аня Жданава – спявачка і прадзюсар, якая паспела пабываць салісткай ў групе Lilac, пахуліганіць ў дуэце “Ландыш $ Сахара” і цяпер радуе сваімі душэўнымі поп-мелодыямі сольна.
Weed&Dolphins. Дзікая камбінацыя клаўд-панка, рэтравэйва і лоу-фая, якая даставіць наўпрост на востраў да героя песень.
Беларускія клаўд-панкі Weed & Dolphins спяваюць на англійскай, шыфруюць свае ідэі ў песнях пра прыгоды прывіда Дэймана на Potato Island і прадстаўлялі Беларусь на буйным музычным шоукейс-фэсце на Балканах MENT Ljubljana.
За 10 гадоў на сцэнах FSP ужо выступілі больш за 240 музыкаў з 20 краін, і каманда фестывалю працягвае адкрываць для Беларусі новых артыстаў: шмат хто з іх прыязджае ў Мінск упершыню. Гэта ўжо стала добрым рытуалам арт-пікніка – знаёміць гасцей фестывалю з музыкай, якую яны пасля з падзякай дадаюць у свае плэйлісты.
Акрамя танцаў юбілейны FSP X рыхтуе для гасцей адукацыйны спот EDUTAINMENT, дзіцячую пляцоўку мары Kidsters, меку для моднікаў – Design Market, месца сустрэчы самых папулярных і прыгожых – Blogeria і экстрэмальныя забавы ў Extreme Village.
Квіткі па кошце 24,99 BYN (на адзін дзень) і 34,99 BYN (на два дні) даступныя на сайце artpicnic.by.
Далучайцеся: facebook, vk, instagram, twitter, youtube, telegram, viber
Сачыце за абвесткамі па хэштэгу #ilovefsp
Паволе арганізатараў
