Фільм маладога беларускага рэжысёра Кірыла Нонга «Работнік года» працягвае збіраць ураджай прэстыжных кінаўзнагарод. Пасля Гран-пры фестывалю мабільнага кіно velcom Smartfilm-2017 гэтая праца была ўганараваная прызам журы «Зала славы» і перамогі ў намінацыі Smart Fiction фестывалю SmartPhilm ў Вашынгтоне (ЗША).
«Работнік года» – кароткаметражны фільм, які апавядае пра свет, дзе робаты паступова выцясняюць людзей. Журы фестывалю SmartPhilm 2018 прызнала яго найлепшым у катэгорыі фантастычных фільмаў (дарэчы, у фінале намінацыі «Работніку года» склалі канкурэнцыю яшчэ 14 работ), а таксама ўганаравала галоўнай узнагародай – прызам журы «Зала славы».
Адметнай рысай фестывалю SmartPhilm з’яўляецца тое, што ўсе фільмы, якія ўдзельнічаюць у ім, знятыя выключна на смартфоны або іншыя мабільныя дэвайсы. Такім чынам арганізатары імкнуцца зраўняць у тэхнічным аспекце шанцы аўтараў-пачаткоўцаў і прафесійных рэжысёраў, ацэньваючы ў першую чаргу крэатыўнасць і творчы падыход.
«Нам вельмі прыемна, што працы, якія атрымалі высокія ацэнкі журы velcom Smartfilm, дамагаюцца поспеху на кінафорумах за мяжой. Наш фестываль задумваўся менавіта як пляцоўка, якая дае магчымасць заявіць пра сябе таленавітым, яркім, неардынарным аўтарам. У 2018 годзе фестываль мабільнага кіно velcom Smartfilm будзе праходзіць ужо восьмы раз. Мы спадзяемся, што калекцыя фестывальных работ папоўніцца новымі яркімі працамі, і жадаем поспеху ўсім, хто падасць заяўкі на ўдзел», – адзначылі арганізатары фестывалю velcom Smartfilm.
Аўтар фільма «Работнік года» – беларускі рэжысёр, выпускнік Нью-ёркскай кінаакадэміі (New York Film Academy) Кірыл Нонг. Галоўныя ролі выканалі акцёр з Санкт-Пецярбурга Канстанцін Фісенка і заслужаны артыст Беларусі Аляксандр Кашпераў. Фільм «Работнік года» ўжо дамогся поспеху на радзіме, атрымаўшы Гран-пры фестывалю velcom Smartfilm-2017, пасля чаго паўтарыў свой поспех за акіянам.
Паводле прэс-рэлізу
