Аўтамабільная экспедыцыя “Пераможны беларускі Galaxy S4 Zoom”, зладжаная кампаніяй Samsung, парталам Holiday.by і кампаніяй Škoda Auto, шалёна праехалася па месцах баявой славы. Мэта экспедыцыі – нагадаць пра сілу, мужнасць і адвагу нашага народу ў падарожжы з поўным пагружэннем у часы суровых выпрабаванняў войнамі і бітвамі. Пра акцыю, хакей і сярэднявечных трэндсэтэраў парталу Budzma.org расказала Ганна Шутава – карпаратыўны PR&Brand мэнэджар Samsung у Беларусі.
Ідэя
Гэта праект камерцыйнага прадукту, але ён непасрэдна прывязаны да нацыянальнай спецыфікі Беларусі, да актывацыі цікавасці беларусаў да сваёй культуры, гісторыі і спадчыны. Чаму менавіта месцы вайсковай славы? Мы вырашылі прывязаць значныя месцы (а ў Беларусі іх шмат, і абраныя – толькі частка з усіх) да блізкага чэмпіянату свету па хакеі – месца сапраўдных бітваў у сённяшніх рэаліях.
Нягледзячы на спрэчкі, якія выклікае сам чэмпіянат сярод беларусаў і на скепсіс у дачыненні да нашых спартоўцаў і асабліва да хакейнай зборнай, якая грае не так яскрава, як бы нам усім хацелася, мы не маглі абысці чэмпіянат увагай, бо гэта сапраўдная падзея. І часовы скепсіс і паразы зусім не адмяняюць тую гістарычную спадчыну і дух, якім валодаюць беларусы. Не зважаючы на чысткі розных вякоў, наша нацыя захавала байцоўскі ген, і, каб нагадаць пра яго, мы і абралі самыя значныя месцы вайсковых баталій, дзе дух нацыі праявіўся найболей.
Месцы
Усе пункты экспедыцыі – месцы, дзе беларусы добра разумелі, што такое тактыка і стратэгія, і ўпісвалі свае імёны ў сусветную гісторыю дзякуючы ўласцівым нам моцы і навыкам выйграваць. Няміга – месца хутчэй легендарнае, бо усе падзеі бітвы заснаваныя больш на трактоўках, чым на сведчаннях, але яе роля неаспрэчная. Орша – тут адназначна вайсковы талент Астрожскага. 1944 год – падзеі вельмі трагічныя, але менавіта яны дэманструюць якасць нацыі і яе ваярства, магчымасць пастаяць за сябе.
Уладзімір Арлоў пра бітву на Нямізе. Болей беларускай гісторыі – у блогу БудзьмаТУТ
Магчымая, канечне, палеміка, наколькі ідэальна прадукт кладзецца на абраную канцэпцыю. Мы дэманструем, што з дапамогай новага гаджэта Galaxy S4 Zoom можна зафіксаваць у памяці самыя розныя лакацыі, незвычайныя, часам нават фантастычныя. Гонар для нас, як для міжнароднага брэнда, – дакрануцца і зафіксаваць такія значныя для Беларусі месцы ў нашай рэкламе.
Samsung VS Belarus
Тэндэнцыя да таго, што міжнародныя кампаніі болей карыстаюцца беларусацэнтрычным падыходам, 
на нашым рынку ёсць, і яна цалкам лагічная. Для міжнародных кампаній рынак – гэта ўвесь свет. Але трэба разумець, што ўвесь свет – не рынак. У кожнай краіне свае асаблівасці і адметнасці, і, каб наблізіцца да спажыўца, нам трэба выкарыстоўваць блізкія яму вобразы. Мэта ва ўсіх кампаніях камерцыйная, таму міжнародныя брэнды больш скіраваныя на разуменне спажыўца і імкнуцца на кожным рынку камунікаваць згодна з рэаліямі месца, а не па шаблоне.
Прыклад рэкламы Samsung у Польшчы
Samsung, дарэчы, працуе так у кожнай краіне: у кожным рэгіёне распрацоўваюцца свае акцыі. Звычайна ў камунікацыі брэнда задзейнічаныя як мінімум лакальныя селебрыці, носьбіты культурнай спадчыны, часта – фатографы.
Планы
Пакуль у кампаніі няма глабальных планаў на 2014 год, ёсць толькі спіс прадукцыі для прамоцыі. Адназначна можна сцвярджаць толькі тое, што ўся камунікацыя па-ранейшаму будзе заснаваная на разуменні нацыянальнага каларыту Беларусі. Што да карпаратыўнай адказнасці ў кампаніі, то мы пачынаем працу з беларускімі дзеткамі, упэўненая, што будзе і падтрымка нацыянальных, культурніцкіх праектаў. (Памятаеце, як у Мінску з’явіліся плакаты ў падтрымку беларускай мовы? Праект реалізаваны Samsung з дапамогай беларусаў, якія сталі аутарамі здымкаў. — заўв. budzma.org)
Машына часу?
Калі ўключыць фантазію і падумаць, хто з «сярэднявечных селебрыці» мог бы стаць тварам кампаніі Samsung у Беларусі, думаю, мы звярталіся б да інжынераў, першаадкрывальнікаў, да людзей, якія актыўна змяняюць свет. Ідэальна ўпісаўся бы (вядома, калі б бакі дамовіліся) у камунікацыйныя праекты кампаніі Леў Сапега. Сапега актыўна развіваў друкарскую справу і ўвогуле вельмі актыўна нёс інфармацыю ў масы. (З імем Сапегі звязанае выданне трэцяга Статута і Галоўнага трыбуналу ВКЛ. – заўв. budzma.org). Думаю, скласці яму добрую кампанію мог бы і Казімір Семяновіч – сапраўдны беларускі Леанарда да Вінчы, удзельнік кароннага войска Рэчы Паспалітай, збройнік, ваенны інжынер, артылерыст, адзін з пачынальнікаў ракетнай справы ў Еўропе.
Алесь Плотка, фота – Юлія Мацкевіч, Holiday.by, сацыяльныя сеткі
Болей пра вандроўку чытыць тут і чытаць тут
Лепшыя працы беларускай рэкламы заўжды можна прагледзець на сайце Фестывалю беларускамоўнай рэкламы і камунікацыі Ad.nak!
