Ва ўнівэрсытэтах Беларусі можа зьявіцца курс гісторыі беларускай дзяржаўнасьці з падручнікамі ад каманды пад кіраўніцтвам дэпутата Марзалюка, піша БелТА. Ці рашэньне канчатковае, невядома – паведамляе Свабода.
Адзін з аўтараў манаграфіі «Гісторыя беларускай дзяржаўнасьці» прафэсар Валянцін Голубеў заявіў, што гісторыю беларускай дзяржаўнасьці будуць выкладаць замест гісторыі Беларусі «з наступнага году, хутчэй за ўсё», — «гэта амаль вырашана». Паводле Голубева, на гэта дадуць нават больш навучальных гадзінаў, чым было на гісторыю Беларусі.
Пытаньне разглядалася на радзе рэктараў ВНУ, расказаў акадэмік-сакратар Аддзяленьня гуманітарных навук і мастацтваў Акадэміі навук Аляксандар Каваленя. Паводле яго, «сёньня ўжо можна казаць аб тым, што такі курс ухвалены дэканамі і рэктарамі нашых ВНУ», і першы варыянт праграмы ўжо разгледжаны.
Міністэрства адукацыі і Нацыянальны інстытут адукацыі пра такія пляны пакуль не паведамлялі. Але пра пляны што да прадметаў расказала ня толькі БелТА, але і іншыя дзяржаўныя СМІ.
На момант публікацыі быў выдадзены першы з 5 тамоў «Гісторыі беларускай дзяржаўнасьці» — толькі на расейскай мове накладам 500 асобнікаў. Пазьней плянуецца выданьне па-беларуску.
Акрамя яго, асобны калектыў аўтараў на чале з дэпутатам Ігарам Марзалюкомрыхтуе падручнік гісторыі беларускай дзяржаўнасьці. Марзалюка называюць«галоўным гісторыкам» у дзяржаўных структурах за актыўнасьць у гістарычнай галіне (ён, напрыклад, адмаўляе «беларускасьць» паўстаньня Каліноўскага) і наяўнасьці «рэсурсаў для лабіяваньня пэўных ідэяў».
Лукашэнка ня супраць адлічваць беларускую дзяржаўнасьць ад IX стагодзьдзя
Аб гісторыі беларускай дзяржаўнасьці адносна нядаўна разважаў Аляксандар Лукашэнка: ён згадваў Полацкае княства як «гістарычную калыску» беларускай дзяржаўнасьці, але не разабраўся з гістарычнай роляй Беларускай Народнай Рэспублікі.
Тымчасам орган ягонай адміністрацыі газэта «Беларусь сегодня» вырашыла адлічваць беларускую незалежнасьць ад 1994 году — заявіўшы, што да Лукашэнкі фактычна не было беларускай незалежнасьці.
Як перадае БелаПАН, на сустрэчы з журналістамі загадчыца цэнтру археалёгіі і старажытнай гісторыі Акадэміі навук Вольга Ляўко расказала, што Лукашэнка два гады таму цікавіўся ў яе, хто фармаваў беларускую дзяржаўнасьць, пачынаючы з («як вы кажаце», адзначыў Лукашэнка) IX стагодзьдзя. А яна, паводле ейных словаў, адказала: «Ніхто. Мы гэта зрабілі самі. Гэта адбылося ў працэсе разьвіцьця народу, які засяляў тэрыторыю Беларусі ў той пэрыяд часу».
Ляўко заявіла, што казаць пра пачатак беларускай дзяржаўнасьці ў IX стагодзьдзі можна ня толькі праз першую згадку Полацку, датаваную 862 годам, але і праз тое, што палачане тады называлі сябе так праз назву ракі, ля якой пасяліліся, таму можна лічыць, што ў іх «сфарміраваліся нейкія больш-менш пастаянныя тэрыторыі, на якіх пражывала цесна зьвязанае эканамічнымі і культурнымі інтарэсамі насельніцтва».
Яна дадала, што «адзінай старажытнарускай народнасьці» тады ня склалася – і што былі прычыны, «якія аддзялялі гэтых людзей адзін ад аднаго, дазволілі ім пайсьці сваім шляхам далей і стварыць свае ўласныя супольнасьці ўнутры ўсходніх славянаў».
