У Маладзечне прайшоў вечар гарачых абмеркаванняў валанцёрскіх праектаў. Грамадскія аб’яднанні, суполкі і асобныя ініцыятары прэзентавалі сваё бачанне таго, што варта зрабіць у родным горадзе ці яго наваколлі: ад парковак для ровараў да аналізу наступстваў меліярацыі.
Разам з менеджарамі “Будзьмы” дзесяць прэзентацый каментавалі, крытыкавалі і раілі, як палепшыць, галоўны ахоўнік помнікаў Антон Астаповіч, кіраўнік Школы маладых менеджараў SYMPA Дзмітрый Маркушэўскі, экс-старшыня “Гісторыкі” Зміцер Рагачоў.
Прэзентацыя першага праекта прайшла без аўтаркі. Наталля Сухая хоча аднавіць вясковую хату і стварыць там музей выцінанкі, а таксама прастору для творчых пікнікоў, майстар-класаў і іншых выставаў. Аднак гэтая ідэя справакавала спрэчку паміж адмыслоўцамі і залай праз пытанне: ці хопіць у Маладзечне (дзе месціцца каледж народных рамёстваў з класамі выцінанкі) майстроў, каб ствараць цікавыя экспазіцыі і ладзіць мерапрыемствы. Адмыслоўцы адзначылі, што для развіцця праекта мала знайсці валанцёраў і майстроў – варта, каб ў хаце-музеі ўвесь час быў цікавы чалавек, вакол якога б гуртаваліся аднадумцы і прагныя да новых ведаў экскурсанты.
“Акно ў мінулае” было заяўленае як серыя адукацыйных праектаў, а да прэзентацыі стала двума этна-фестывалямі, варштатамі, лекторыямі і планамі на ажыццяўленне “Плаці наперад”. Гэта, напэўна, адзін з трох самых глабальных праектаў. У арганізатараў ужо шмат чаго ёсць для рэалізацыі, аднак т’ютары рэкамендавалі драбніць гэты вялікі ком ідэй на часткі і рэалізоўваць іх паступова.
У Вілейцы Павел Хаванскі хоча зладзіць “Горад майстроў”. Спадара вельмі хвалюе, што вілейчукі з’язджаюць з горада, бо там няма ні працы, ні варыянтаў добрага адпачынку. За першую праблему Павел (пакуль) не бярэцца, а другую вырашыць праз шэраг майстар-класаў для моладзі. Там наведнікаў будуць вучыць кавальству, ганчарству і г.д. Аднак пытанне грошай стаіць перад праектам гэтак жа няўмольна, як і перад усімі. Таму адмыслоўцы прапанавалі Паўлу і яго камандзе ці паспрабаваць прысуседзіцца да гарадскіх святаў, ці прапанаваць мясцовай уладзе з разлікам на тое, што тым усё адно па плане варта праводзіць культурна-асветніцкую дзейнасць.
Валя Трубач і калегі прыдумалі навучыць Маладзечна народным танцам і для гэтага зладзіць танцавальны марафон. У шэрагу месцаў правядзення будуць не толькі школы і каледжы, але нават фірмы, банкі і бары. Іх фінансавае пытанне знаўцы прапанавалі вырашаць праз бартар. Па тыя ж флаеры звярнуцца да мясцовай кампаніі па друку і прапанаваць ім змясціць сваю рэкламу.
Аляксей Жахавец прадставіў другі па глабальнасці праект “Гарадок – вядомы і невядомы”. Гаворка ідзе пра самае старажытнае паселішча Маладзечаншчыны. Спадар ужо зрабіў сайт мястэчка, завёў канал на Ют’юбе і раскапаў багата цікавых гісторый, старых фотаздымкаў і г.д. Ён хоча правесці археалагічныя даследаванні, зрабіць Гарадок прывабным для турыстаў і яшчэ багата чаго, у тым ліку і пытанні меліярацыі. На гэта т’ютары прапанавалі вырашаць задачы паступова: спачатку звярнуцца да турфірм, што цяпер шукаюць новыя кірункі, і распавесці пра Гарадок. Замест археалагічных прац скласці мапу цікавых мясцовых аб’ектаў. А каб прасунуць канал і сайт – супрацоўніцтва з іншымі паблікамі.
Амаль гатовы праект “Папулярызацыя міжваеннай архітэктуры Маладзечна” прапанаваў Уладзімір Садоўскі (так, гэта ён напісаў “1813“). Ён сабраў звесткі пра цікавую забудову горада і плануе звярнуцца да дзяржавы, каб будынкам былі нададзеныя статусы гісторыка-культурнай спадчыны. Гэта, пэўна, адзіны праект, рэалізацыі якога бракуе грошай. Уладзімір мае патрэбу ў парадах, як ліставацца з дзяржустановамі, а тут адмыслоўцы і самі вызваліся дапамагчы.
“Прыхаванае вякамі” распавядзе і тутэйшым, і ўсім іншым пра славутасці Маладзечна і яго знакамітых жыхароў. Алеся Каролік хоча зладзіць здымкі кароткіх ролікаў-экскурсій па родных мясцінах. Каб скараціць выдаткі і шлях да трансляцый на тэлебачанні, знаўцы параілі якраз з мясцовага канала і пачаць. Там могуць не толькі распавесці пра крытэрыі якасці тэлеролікаў, але і дапамагчы рукамі і тэхнікай.
Новай формай культурнага адпачынку мае стаць “Праспект “РГ”. “Рэгіянальная газета” плануе стварыць сваю культурную прастору з фрымаркетамі, танцамі, музычнымі выступамі і любой цікавай гараджанам актыўнасцю. Наталля Тур прызналася, што акрамя сродкаў ім дужа бракуе бізуна, каб ад пажаданняў перайсці да справы. Т’ютары параілі абраць менеджара для такой ініцыятывы і звярнулі ўвагу каманды праекта на тое, што свята штодня можа надакучыць мясцовым жыхарам, і з імі таксама варта неяк дамовіцца.
“Здаровы горад” бярэцца вырашыць праблемы Маладзечна з безбар’ерным асяроддзем, роварнымі паркоўкамі і жудасным станам тратуараў. Каб стварыць велаінфраструктуру і пляцоўкі для воркаўта, адмыслоўцы параілі Андрэю Буслаўскаму пераняць досвед у Мінскага роварнага таварыства, таварыства людзей з абмежаванымі магчымасцямі і паспрабаваць сабраць сродкі праз краўдфандынг.
Праект “Карані” быў прадстаўлены па-за конкурсам і пакінуў самыя моцныя ўражанні. На жаль, праз вершы, прыгожы відэаролік і блытаны выбух эмоцый не было зразумела, што канкрэтна гэта за праект, але сіла імпэту, з якім яго намагаліся прэзентаваць, выклікае павагу. І гэта быў самы аб’ёмны прект з баламі, царкоўнымі святамі, зборам і рэстаўрацыяй старажытных рэчаў. Тут парады былі простыя: структураваць прапанову, падзяліць яе на часткі кшталту збору і апрацоўкі старых фотаздымкаў.
Напрыканцы адмыслоўцы адзначылі, што ўсе праекты жыццяздольныя, а некаторыя будзе прасцей зладзіць, калі аб’яднаць некалькі падобных ініцыятыў. Яны таксама параілі ўсім не спыняцца. Рэгіянальны менеджар “Будзьмы” Марыя Шарый нагадала, што па юрыдычныя і іншыя кансультацыі можна звяртацца ў грамадскую кампанію.
Падчас прэзентацый гледачы пазначалі баламі розныя аспекты праектаў. Па гэтых пазнаках будзе абраны пераможца “Кірмашу праектаў”. А хто хоча даведацца пра прапановы больш, можа завітаць на старонку Талакі.
Па выніках экспертнага галасавання: зараз эксперты кампаніі працуюць над вызначэннем пераможцаў і пошуку партнёраў для рэалізацыі гэтых праектаў. Падрабязная інфармацыя будзе неўзабаве.
Марыя Грыц, фота Зарыны Кандрацьевай
