Арыгінальныя ўзоры кніг – мініяцюрныя выданні розных часоў, кірункаў і аўтараў прэзентавалі на выставе “Дзівосы на далонях”, што адкрылася ў Дзяржаўным музеі гісторыі беларускай літаратуры 4 лютага.
Каля чатырохсот экзэмпляраў кніжнага мастацтва ад кулінарных кніг да філасофскіх і рэлігійных выданняў трапілі на выставу з асабістай калекцыі бізнэсмэна Яўгена Ксяневіча
Яўген Ксяневіч:
– Гэта адна з нешматлікіх падзеяў за апошнія дваццаць гадоў, калі выстаўляюцца мініяцюрныя кнігі. Дваццаць гадоў таму існавалі літаратурныя клубы, і гэтая справа была больш распаўсюджаная. Першы клуб з’явіўся ў 1972 годзе ў Маскве, а на першай выставе мініяцюрнай кнігі было прадстаўлена 215 кніг. Тут сабрана амаль у два разы больш.
Слоўнік можа лёгка змясціцца на далоні, а творы Шэкспіра – у кішэні. У калекцыі Яўгена Ксяневіча за трыццаць гадоў збіральніцтва мініяцюрных твораў паліграфічнай справы ёсць малітвасловы і падручнікі па шахматах, дзіцячыя выданні і гістарычныя паданні. Як цвердзіць калекцыянер, кнігі былі сабраныя на абшары ад Будапешту да Магадану.
Гісторыя беларускай мініяцюрнай кнігі пачынаецца з XVII стагоддзя выданнем малітваслова і святцаў, а беларускія міні-кнігі на выставе прадстаўленыя асобнай часткай. Творы Янкі Купалы, Максіма Танка, Цёткі, Леаніда Дайнекі і Леаніда Дранько-Майсюка паўстаюць у нязвыклым, падарожным варыянце.
Выстава прысвячаецца 520-годдзю з дня нараджэння першадрукара і асветніка Ф. Скарыны.
На фота – Яўген Ксяневіч і мініяцюрныя кнігі.
