Мінская СШ № 207 стала пераможцам фіналу конкурсу школьных каманд “Што я ведаю пра Еўропу?”, які адбыўся 20 чэрвеня ў вёсцы Ракаў Валожынскага раёна Мінскай вобласці, паведаміў БелаПАН старшыня Беларускага добраахвотнага таварыства аховы помнікаў гісторыі і культуры Антон Астаповіч.
Арганізатарамі конкурсу, які праводіцца ў рамках агульнанацыянальнай кампаніі “Будзьма беларусамі!” па тэме “Беларуская культура ў еўрапейскім кантэксце” і адбываецца ў краіне ў шосты раз, выступілі ініцыятыўная група па стварэнні “Клуба еўрапейскіх настаўнікаў”, Беларускае шуманаўскае таварыства, зарэгістраванае ў Польшчы, а таксама Беларускае добраахвотнае таварыства аховы помнікаў гісторыі і культуры.
Аўтар ідэі конкурсу Ігар Лялькоў
Конкурс распачаўся ў красавіку 2009 года. Зацікаўленасць ва ўдзеле выказалі 13 каманд з розных рэгіёнаў Беларусі. Адборачны тур прайшоў з 1 па 17 мая ў форме пісьмовых адказаў на конкурсныя заданні, якія былі арыентаваныя на вучняў 7—9 класаў. Пераможцамі адборачнага туру сталі каманды мінскіх школ № 207 і № 131, еўраклуба “Дзе мы?” з Ліды Гродзенскай вобласці і Талькаўскай СШ Пухавіцкага раёна Мінскай вобласці. У Ракаў прыехалі вучні толькі з трох школ, бо адміністрацыя Талькаўскай СШ не дазволіла сваім выхаванцам удзельнічаць у спаборніцтвах. У журы конкурсу ўвайшлі А.Астаповіч, каардынатар кампаніі “Будзьма!” Севярын Квяткоўскі і настаўнік з Мар’інай Горкі Мінскай вобласці Барыс Муха.
Журы: Барыс Муха, Антон Астаповіч, Севярын Квяткоўскі
Як адзначыў А.Астаповіч, школьнікам былі прапанаваныя даволі скаладаныя пытанні па гісторыі Еўропы і Беларусі. З максімальнай колькасці 120 балаў каманда-пераможца набрала 102, школьнікі з Ліды — 100, дзеці з мінскай СШ № 131 — 88.
Адна з арганізатараў Вольга Саўчанка ўручае падарункі ад кампаніі “Будзьма!”
Пераможцы творчай акцыі прэміраваныя паездкай у культурную сталіцу Еўропы-2009 Вільню, а прызёры спаборніцтва — падарожжамі па Беларусі.
Гiсторыя конкурсу бярэ пачатак у 2004 годзе, калi памiж школьнымi камандамi прайшло першае спаборнiцтва на веданне гiсторыi Еўропы і Еўрасаюза. Пераможцамі конкурсу былі каманды Ждановiцкай СШ (Мінскі раён), Расонскай СШ iмя Пятра Машэрава (Віцебская вобласць), славянскай гімназіі з Бабруйска (Магілёўская вобласць), лідскага еўраклуба “Дзе мы?” і сталічнай СШ № 207. Каманды-пераможцы конкурсу ўзнагароджваліся паездкамі ў Варшаву, Брусель, Вільнюс і Кіеў, паведамляе БелаПАН.
Музычны падарунак канкурсантам ад гурту “Босае сонца”
На першым здымку — каманда пераможцаў
Фота Aliaksei.
***
Пры падтрымцы кампаніі “Будзьма!”
