Гурт Re1ikt выступіць з вялікай сольнай праграмай у Карэтным дворыку у Дзень горада Мінска 8 верасня. Музыкі рыхтуюцца прэзентаваць новыя песні. Таксама плануюць адыграць вялікую праграму з старых і вельмі старых хітоў. Чакаюцца і сюрпрызы, у тым ліку з удзелам НФК «Крумкачы».
«Зараз пачынаецца самы цікавы перыяд жыцця гурта – запіс новых твораў, таму мы будзем вельмі рэдка даваць канцэрты пэўны час. Наш вялікі сольны выступ – добрая нагода пачуць нашыя лепшыя песні за доўгі перыяд і самае галоўнае – ўпершыню пачуць новую песню, якую мы яшчэ ніколі не выконвалі дагэтуль. І вы зможаце трошкі ўявіць, якім будзе новы дыск», – распавядае лідар і бубнач Re1ikt Аляксандр Дземідзенка.
Выступ адбудзецца ў рамках праекта “Пешаходка”. Адрас пляцоўкі «Карэтны дворык»: вул. Кірыла і Мефодзія, 8. Пачатак канцэрта: 20:30.
Гурт Re1ikt спалучае сучасныя музычныя плыні з традыцыйным беларускім песенным фальклорам, робячы яго актуальным для слухачоў, якія шукаюць у музыцы нешта новае. Калектыў выкарыстоўвае рэдкія духавыя і перкусійныя інструменты, а таксама незвычайныя гітарныя эфекты. У кампазіцыях каманды спляліся палескі шаманізм, аўтэнтычны драйв і таямнічы беларускі космас.
Re1ikt атрымаў шэраг музычных узнагарод у Польшчы і Беларусі, выступаў ва Украіне, у Літве і Расіі.
Паводле арганізатараў
