з пошты Рэдакцыі
Звычайнае беларускае ўяўленне пра самалёт — гэта дорага! Так, пералёт з Мінска ў Прагу і назад будзе каштаваць 300 еўра.
Але ў Еўропе вялікая канкурэнцыя авіякампаній. Яны спрабуюць перацягнуць кліентаў, прапаноўваючы пералёты па супернізкіх коштах. Найбольш вядомыя сярод такіх — Wizzair, Ryanair. Кампаніі маюць сайты, на якіх можна даведацца цэны і адразу набыць квіток. Толькі сачыце ўважліва: цэны змяняюцца амаль кожны дзень.
Мне пашчасціла знайсці варыянт Катавіцы (недалёка ад Кракава) — Мілан за 40 еўра ў абодва бакі. Лепш за ўсё, браніруючы квіток на сайце, у раздзеле багаж пазначаць «0» і браць з сабою на борт заплечнік. Толькі пазнаёмцеся са спісам дазволеных рэчаў у ручным багажы.
Я карыстаўся сайтам wizzair.com. Спачатку рэгіструемся, падбіраем напрамак. Найбольш танныя вылеты для беларусаў — з Кіева (Украіна), Варшавы і Катавіц (Польшча). (З Беларуссю авіякампанія не працуе.) З Польшчы выбар напрамкаў большы. Запаўняем патрэбныя палі і даходзім да формаў аплаты: грашовы перавод альбо пластыкавая картка.
У Беларусі толькі «БПС‑Банк» робіць карткі для інтэрнэт‑аплатаў. Картка называецца Visa Virtuon, каштуе восем тысяч, вырабляецца тыдзень. Абавязкова трэба замаўляць картку для аплат у еўра ці далярах. Як яе атрымалі, праз банк залічылі грошы на карт‑рахунак — можна замаўляць тур на самалёт і аплачваць. Затым на e‑mail прыходзіць пацверджанне, што пералёт аплачаны. За некалькі дзён да вылета кампанія яшчэ і нагадае, што прыйшоў час збірацца ў вандроўку.
