З апошнім месяцам зімы завяршаецца і наша вялікая камунікацыйная кампанія “Маё права”. Шмат чаго было пад час яе. Але адным з самых яркіх накірункаў дзейнасці гэтай кампаніі сталі нашыя інтэрактыўныя гульні-спектаклі “Ці добра быць суслікам?” і “Па слядах аднаго падання”.
Сябры грамадскай культурніцкай кампаніі “Будзьма беларусамі!” пабывалі са спектаклем у 23 гарадах і мястэчках Беларусі. Гісторыя пра слыннага гетмана Вялікага княства Літоўскага Яна Караля Хадкевіча (1560 – 1621), яго каханую і правы чалавека знайшла водгукі ў сэрцах падрастаючага пакалення. Гледачы не проста сочаць за падзеямі, яны ператвараюцца ў сапраўдных падарожнікаў у часе, дапамагаюць галоўным героям і заадно асэнсоўваюць, як працуюць “правы чалавека” ў рэальным жыцці.
За люты нашыя каманды пабывалі:
- у Оршы
- у Браславе
- у Іўі
- у Барысаве
- у Мінскіх гімназіі № 4, СШ № 151, прыватнай школе “Стэмбрыдж”
- у Полацку
- у Гомлі
- у Трасцянцы
- у Магілёве
- у Салігорску
і на “Мова Фэсце – 2020”, які адбыўся 22 лютага ў гонар дня Роднай мовы.
