Фестываль рэкламы і камунікацыі AD.NAK! пры падтрымцы кампаніі “Шляхетныя вырабы” (гандлёвая марка KARALI) абвясціла конкурс “У мыле сэнс”.
Лазня была заўжды любімай шляхетнай забаўкай. Лазня без мыла – што свята без гасцей. Мыла ў даўнейшыя часы было адзінкавым, эксклюзіўным вырабам. Мыла замаўлялі ў найлепшых майстроў, а тыя варылі яго з найлепшых складнікаў з выкарыстаннем таго, што далі прырода і Бог.
Сёння старадаўнія традыцыі варэння мыла адраджаюцца. Увасабленнем гэтага з’яўляецца мыла KARALI, якое робіцца ТАА “Шляхетныя вырабы” ў Беларусі. Па ініцыятыве гэтай кампаніі ў межах Трэцяга фестывалю беларускамоўнай рэкламы і камунікацыі AD.NAK! ладзіцца конкурс на лепшую назву і запакоўку для мыла “У мыле сэнс”.
“Мэта нашай кампаніі – стварэнне адметных, сэнсоўных, выразнабеларускіх прадуктаў высокай якасці, здольных канкураваць як у Беларусі, так і за яе межамі. Прадуктаў, якія не проста выконваюць сваю функцыю, а маюць сэнс, распавядаюць гісторыю, ствараюць адчуванні. Мы чакаем, што ў выніку гэтага конкурсу народзяцца дзьве новыя такія гісторыі, якія прыйдуцца да спадобы беларусам і не толькі”, — заснавальнік і кіраўнік ТАА “Шляхетныя вырабы” Галіна Яшчанка.
Для ўдзелу ў конкурсе неабходна прыдумаць назву і дызайн запакоўкі для новых гатункаў мыла. Адзін з іх будзе створаны адмыслова для мужчын, другі – для шырокай аўдыторыі і павінен адлюстроўваць значны культурны ці гістарычны беларускі фенамен.
Спецыфічныя ўмовы конкурсу глядзіце ў яго апісанні.
Кожны ўдзельнік конкурсу мусіць зарэгістравацца на сайце ў якасці ўдзельніка Фестывалю і запампаваць сваю работу ў раздзеле «Падаць работу». Назву мыла можна пазначаць у полі назва работы, а дызайн запакоўкі далучыць да заяўкі.
Работы трэба даслаць да 11 чэрвеня. Цырымонія ўзнагароджвання пераможцаў пройдзе 5 ліпеня падчас Вялікага фестывальнага дня. Яны атрымаюць узнагароды ад аргкамітэту фестывалю і адмысловыя прызы ад KARALI.
Работы, дасланыя на конкурс, будуць выкарыстаныя кампаніяй “Шляхетныя вырабы” і неўзабаве разам з мылам з’явяцца ў продажы.
Інфармацыя пра партнёра:
ТАА “Шляхетныя вырабы” спецыялізуецца на вытворчасці якасных прадуктаў сегменту Luxury, якія з’яўляюцца выразна беларускімі. На дадзены момант кампаніяй вырабляецца Шляхетнае мыла ручнога вырабу KARALI шасьці гатункаў: Панна Нясвіжа, Віленскае барока, Валошкі, Папараць, Чырвоныя парэчкі і Цуд на каляды. Увосень плануецца запуск новага якаснага ўласнабеларускага прадукту.
