Раман Уладзіслаў Ахроменкі “Тэорыя змовы” выйшаў па-ўкраінску.
Яго першапачатковая беларуская версія ўпершыню пабачыла свет ў 2011 годзе і выклікала вялікую цікавасць у чытача. У наступны год кніга трапіла ў шорт-ліст літаратурнай прэмія імя Ежы Гедройца. Сам Ахроменка, хоць і жыве ва Украіне 18 гадоў, лічыць сябе выключна беларускім пісьменнікам.
– Я 18 гадоў жыву ва Украіне і гэта дае падставы некаторым украінскім сябрам-пісьменнікам запісваць мяне ва ўкраінскія пісьменнікі, які піша беларускай. Я вельмі паважаю Украіну і ўкраінскую літаратуру. Але я ўсё ж такі беларускі пісьменнік. Нават калі я буду жыць у Камбоджы, ці на Шры Ланцы, ці ў Індыі, я ўсё адно буду пісаць беларускай, і напісанае будзе суб’ектам беларускай літаратуры, адпаведна не камбаджыйскай, не ланкійскай і не індыйскай.
Пераклад рамана зрабілі Вольга Ахроменка і Дзмітрый Шчарбіна. Прадмову да кнігі напісаў вядомы украінскі пісьменнік Аляксандр Ірванец. Мяркуецца, што раман “Тэорыя змовы” будзе прэзентаваны ўкраінскай публіцы на мастацкім фестывалі “і”, які пройдзе ў Тэрнопалі 6-8 траўня.
