Новая кніга Андрэя Горвата «Прэм’ера» прадаецца з 21 снежня. Пра яе выхад чытачы даведаліся толькі ў кнігарні, піша Радыё Свабода.
«Прэмʼера» выйшла ціха, без рэкламы і абвестак у сацыяльных сетках. Але ўжо ў першы дзень продажу яе заўважылі чытачы.
Пасля гучнага поспеху кнігі Горват выдаліў свой акаўнт у фэйсбуку. Дагэтуль ён не з’явіўся ў сацсетках, прынамсі адкрыта.
«Прэм’ера» прадаецца толькі ў двух месцах у Менску: у касе Купалаўскага тэатра і ў «Акадэмкнізе». Ці будзе прэзентацыя кнігі, Горват ня кажа.
Андрусь стаў Андрэем
Аўтар «Прэм’еры» падпісаны як Андрэй Горват. На дэбютнай кнізе аўтар быў пазначаны Андрусём.
«Дзядзька Горват, Андрусік Іванавіч, Андрушачка — гэта ўсё з Facebook расце. Гэта не столькі я ўтвараў гэты вобраз, колькі сама аўдыторыя… Як бы я не мяняў імёны, усё роўна застаюся Горватам. Ёсць нейкая база, ад якой я не адмаўляюся і якая аб’ядноўвае ўсе шызафрэнічныя бакі маёй асобы. Корань адзін. Астатняе — спробы змяніць вобраз персанажа, бо мне ў ім станавілася цесна», — казаў раней Горват у інтэрв’ю Свабодзе.
Наклад «Прэмʼеры» — 1000 асобнікаў. «Радзіва Прудок» стартавала больш сціпла, але пасля некалькіх перавыданняў наклад перавысіў 7000 асобнікаў.
Абедзве кнігі выйшлі ў выдавецтве «Медысонт».
Ад каментароў наконт выхаду кнігі Андрэй Горват адмовіўся.
