Гісторыю навагрудскага гета асабліва часта сталі ўзгадваць у апошнія гады, калі стала вядома, што праз яго прайшлі і адсюль ўцяклі ў партызаны сваякі дарадцы прэзідэнта ЗША і яго зяця Джарэда Кушнера.
Скульптурная кампазіцыя ўяўляе сабой фігуру дзяўчынкі ў касцюме анёла і дрэва жыцця з адсечанымі галінамі.
«Гэта памятны знак дзіцяці, якому вельмі хочацца жыць. І зараз дзяўчынка будзе жыць вечна, бо яна стаіць побач з дрэвам жыцця», — патлумачыла задуму адна з куратараў праекта краязнаўца Тамара Вяршыцкая.
Паводле яе слоў, унікальнасць гэтага помніка, перш за ўсё, у тым, што ініцыятарам яго стварэння стаў мясцовы жыхар. Да гэтага часу грошы на ўвекавечанне памяці давалі толькі замежнікі: Музей габрэйскага супраціву ў Наваградку ствараўся за сродкі еўрапейскага фонду і ахвяраванні брытанскага падданага, а ў мінулым аднаго з вязняў Навагрудскага гета Джэка Кагана. Сад справядлівасці і міласэрнасці фінансаваў нямецкі фонд. Нарэшце, бацька зяця Трампа Джарэда Кушнера Чарльз пералічвае грошы на стварэнне яшчэ аднаго манумента. І вось зараз свае асабістыя сродкі ў гісторыю трагедыі ўклаў і беларус: гэтым разам да справы спрычыніўся мясцовы прадпрымальнік Сяргей Коваль.
