Адзінаццаць студэнтаў БДУ сталі пераможцамі X Рэспубліканскага літаратурнага конкурсу студэнтаў і школьнікаў «БрамаМар», паведамляе Звязда са спасылкай на прэс-службу ВНУ.
Творчае спаборніцтва сярод студэнтаў прайшоў у пяці намінацыях: «Паэзія», «Проза», «Драматургія», «Крытыка» і «Пераклад». Школьнікам прапаноўваліся першыя дзве катэгорыі. Работы ацэньвала журы ў складзе вядомых беларускіх літаратараў, крытыкаў і журналістаў. Усяго на конкурс было даслана 146 работ. Пераможцамі прызнаныя 33 маладых аўтара. Гран-пры заваявалі другакурсніца факультэта журналістыкі БДУ Ксенія Зарэцкая і школьнік з Мядзела Мікіта Балюк. Дзяўчына прадставіла сем празаічных і чатыры паэтычных творы, дзе закранула тэмы кахання, сям’і і творчасці. Мікіта Балюк напісаў фантастычны аповед на беларускай мове пра прышэльцаў і аформіў яго аўтарскімі ілюстрацыямі.
Пераможцамі ў намінацыі «Паэзія» сталі студэнты факультэта журналістыкі БДУ другакурснікі Лізавета Арлова, Валерыя Гаўруковіч, Вікторыя Трыфанава, Раман Гадун, трэцякурсніца Кацярына Тарасава, студэнтка трэцяга курса Юрыдычнага каледжа Ганна Лашук, чацвёртакурсніца фізічнага факультэта БДУ Вераніка Станевіч, студэнтка пятага курса біялагічнага факультэта БДУ Яна Крэмень. Таксама лепшымі ў гэтай намінацыі сталі Яніна Равяка і Вольга Нікіценка з Мінска. У намінацыі «Проза» перамогу атрымалі студэнткі факультэта журналістыкі БДУ другакурсніца Валерыя Гаўруковіч і трэцякурсніца Кацярына Тарасава, студэнтка трэцяга курса філалагічнага факультэта БДУ Ульяна Зяткіна, а таксама Ксенія Лысенка з Віцебска і Алёна Манкевіч з Мінска. Пераможцамі ў намінацыі «Драматургія» названыя Антаніна Камельчык з Мінска і Алена Полівёнак з Гродна, у катэгорыі «Пераклад» лепшымі сталі работы студэнткі трэцяга курса філалагічнага факультэта БДУ Дар’і Талалаевай і Вольгі Нікіценкі з Мінска, а ў намінацыі «Крытыка» перамогу атрымала Ганна Плаван з Гродна. Сярод школьнікаў лепшымі празаікамі названыя Валерыя Брынчук, Ганна Кершыс, Мікіта Солтан, Сяргей Івашкоў (Мінск), Наталля Аніковіч, Валерыя Баранава (Орша), Вікторыя Каханоўская, Алена Полівёнак (Гродна), Марат Крупко (Салігорск). У намінацыі «Паэзія» лепшымі сярод школьнікаў сталі Валерыя Бакланава (Гомель), Яўгенія Мароз (Мінск), Максім Нехвядовіч (Мядзел), Вікторыя Каханоўская, Ганна Коршун, Сава Вішэйка (Гродна), Наталля Драздова (Магілёў). Узнагароджанне пераможцаў пройдзе з 20 па 29 студзеня па адрасе: вул. Кальварыйская, 9, каб. 323.
Рэспубліканскі літаратурны конкурс «БрамаМар» упершыню прайшоў у 2010 годзе. Яго ініцыятарамі выступілі студэнты кафедры літаратурна-мастацкай крытыкі факультэта журналістыкі БДУ. У 2018 годзе конкурсу афіцыйна прысвоены статус рэспубліканскага. Штогод яго ўдзельнікамі становяцца больш за 300 таленавітых школьнікаў і студэнтаў з усіх рэгіёнаў Беларусі. Скіраваны конкурс на развіццё творчага патэнцыялу моладзі. Арганізатарамі літаратурнага спаборніцтва выступаюць кафедра літаратурна-мастацкай крытыкі, Міністэрства інфармацыі Беларусі і Выдавецкі дом «Звязда».
Сяргей РАСОЛЬКА, Звязда
