Еўрапейскі гуманітарны ўніверсітэт (Вільня, Літва) запрашае студэнтаў бакалаўрскіх і магістарскіх праграм да ўдзелу ў ХХ Міжнароднай студэнцкай канферэнцыі ЕГУ, якая адбудзецца 5-6 траўня 2018 года ў Вільні.
Акадэмічная супольнасць, арыентаваная на вытворчасць сацыяльна адказнай крытычнай веды, міждысцыплінарную кааперацыю, эксперыментаванне з формамі даследчай працы і шырокую экспертызу ўсходне-еўрапейскіх працэсаў, прапануе разам шукаць адказы на наступныя пытанні:
- Дэ-цэнтраванне ўніверсітэта: Хто сёння ўдзельнічае ў барацьбе за права на вытворчасць веды?
Тэматычныя фокусы: Каму сёння належыць права на вытворчасць ведаў? Як ціск на ўніверсітэт змяняе практыкі акадэмічнай працы? Як новыя тэхналогіі ўплываюць на адукацыю і даследаванні? Сведкамі ўзнікнення якіх новых формаў і супольнасцяў ведаў мы робімся? Як арганізаваны інстытут экспертызы? Хто фармуе новыя супольнасці ведаў? Ці існуе акадэмічная салідарнасць і які яе лёс у сучасным свеце?
- Уяўленні аб Цэнтральнай і Усходняй Еўропе: Якія эфекты палітычных і праўных трансфармацыяў?
Тэматычныя фокусы: публічная палітыка, грамадзянская супольнасць і практыкі салідарнасці, міграцыйны крызіс і правы чалавека, эканамічная бяспека і праблемы еўрапейскай інтэграцыі, 100-годдзе абвяшчэння Беларускай Народнай Рэспублікі і “новыя нацыяналізмы”, гендар і палітыка.
- У-ва-сабленне станаўлення: Як вынайсці мовы апісання сучасных культурных працэсаў і антрапалагічных зрухаў?
Тэматычныя фокусы: палітыкі памяці і актуалізацыя/вынаходніцтва спадчыны, “эмацыйны паварот” у гуманітарных навуках, сацыягуманітарныя праблемы навукова-тэхналагічнага развіцця.
- Праектаванне пераўтварэнняў/designing change: Як шукаць эксперыментальныя формы партнерства для прыкладной крытычнай тэорыі?
Тэматычныя фокусы: партысіпатыўныя падыходы да даследавання і стварэння праектаў у дызайне, архітэктуры, урбаністыцы, ‘практычныя’ даследаванні (practice-led research) і іх уплыў на вытворчасць новых ведаў, гендарны падыход у творчых, праектных практыках, ядзерныя тэхналогіі і новыя экалагічныя тэорыі.
- Дыгіталізацыя навачаснасці: Як адказваць на эпістэмалагічныя і прагматычныя выклікі лічбавай рэальнасці?
Тэматычныя фокусы: размеркаваная веда і лічбавыя эканомікі, новыя формы ўдзелу і лічбавы паварот у сацыягуманітарыстыцы, дыгіталізацыя штодзённасці і лічбавая праца, камунікацыя і ідэнтычнасць у лічбавым асяроддзі, кампутарныя гульні і новыя формы мастацтва, курыраванне дадзеных і краўдсорсінг.
Секцыі канферэнцыі будуць сфармаваныя па выніках адбору атрыманых заявак.
У межах канферэнцыйнай праграмы пройдуць варштаты, адкрытыя інтэрактыўныя лекцыі, круглыя сталы, прэзентацыі кніг і студэнцкіх праектаў і г.д.
Працоўныя мовы канферэнцыі: беларуская, руская, англійская.
Працэдура і тэрміны падачы заявак
Заяўкі прымаюцца ад студэнтаў бакалаўрскіх і магістарскіх праграм (ці эквівалентных ім). Удзел у канферэнцыі – на падставе конкурсу (будзе зроблены адбор заявак). Анлайн-заяўка павінна ўтрымліваць тэзісы даклада (аб’ём не больш за 500 словаў). Прыярытэт будуць мець даклады, у якіх прадстаўленыя вынікі эмпірычных даследаванняў.
Апошні тэрмін падачы заявак – 8 сакавіка 2018 г. Вынікі конкурснага адбору будуць паведамленыя не пазней за 17 сакавіка 2018 г.
Удзел у канферэнцыі бясплатны (без рэгістрацыйнага ўнёску). Канферэнцыя вочная: патрабуецца абавязковая асабістая прысутнасць удзельніка ў Вільні і выступленне з дакладам.
Месца правядзення канферэнцыі: навучальны корпус Еўрапейскага гуманітарнага ўніверсітэта.
Візавая падтрымка
Студэнты, якім неабходная візавая падтрымка, павінныя ў заяўцы пазначыць актуальныя пашпартныя звесткі для атрымання візаў.
Выдаткі на праезд
Выдаткі на праезд да Вільні і назад удзельнікі аплачваюць самастойна. ЕГУ не мае магчымасці забяспечыць удзельнікам трэвэл-гранты.
Жытло
На перыяд правядзення канферэнцыі ўсім удзельнікам прадастаўляецца жытло ў бюджэтных гатэлях або хостэлах (бясплатна на дзве ночы – 4–6 траўня). Універсітэт не пакрывае выдаткі на жытло па-за пазначанымі датамі.
Харчаванне
Падчас працы секцый будуць арганізаваныя кава-паўзы для ўсіх удзельнікаў. Іншыя выдаткі на харчаванне ўдзельнікі пакрываюць самастойна. Сутачныя не прадугледжаныя.
Зборнік навуковых працаў
Зборнік тэзісаў не публікуецца. Па выніках канферэнцыі плануецца выданне анлайн-зборніка артыкулаў удзельнікаў канферэнцыі. Працэдура адбору артыкулаў для публікацыі:
- вы выступаеце з дакладам на нашай канферэнцыі;
- кіраўнік секцыі рэкамендуе ваш даклад да публікацыі (увага: рэкамендаваныя будуць толькі найлепшыя даклады);
- цягам вызначанага часу вы перапрацоўваеце даклад у артыкул і дасылаеце яго кіраўніку секцыі;
- кіраўнік секцыі прымае альбо адхіляе артыкул, выказвае заўвагі і прапановы па ўдасканаленні;
- зборнік праходзіць рэдактуру.
Кантакты
Кантактны адрас: studentconference@ehu.lt За абнаўленнямі сачыце на старонцы канферэнцыі, а таксама на нашых старонках у сацыяльных сетках: VK, Facebook.
