Мы сабралі самыя папулярныя петыцыі, якія беларусы падпісвалі апошнім часам на пляцоўках Change.org, Petitions.by і Zvarot.by. Наколькі яны спрацавалі і дапамаглі змяніць рэчаіснасць?
Не пачынаць вытворчасць каўбасы і тушонкі з баброў
Фота: change.org
Падпісалі: 130 тысяч чалавек.
Вынік: няма.
Вызваліць расіянку Марыю Рымар, якой пагражаў тэрмін за няўдалы жарт у мінскім аэрапорце пра траціл у торбе
Фота: change.org
Падпісалі: больш за 107 тысяч чалавек.
Вынік: Адбыўся суд, які прызначыў пакаранне ў выглядзе штрафу на тысячу даляраў, пасля чаго жанчыну адпусцілі дадому. Муж Марыі лічыць, што, калі б не было рэзанансу тэмы, Марыю пакаралі б больш жорстка.
Адмяніць дзеянне дэкрэта №3 «Аб папярэджанні сацыяльнага ўтрыманства»
Фота Сяргея Гудзіліна
Віталь Юрчанка з Гомеля выставіў такое патрабаванне амаль адразу ж пасля ўступлення дэкрэта ў сілу. Уласна, хто гэтага толькі ўжо не патрабаваў.
Падпісалі: 60 тысяч чалавек з невялікім. Яшчэ амаль што 30 тысяч беларусаў выказалі электронную салідарнасць пад петыцыяй з аналагічнай тэмай на сайце Zvarot.by.
Вынік: няма.
Беларуская мова — таксама дзяржаўная. Інфармацыя пра тавары і паслугі павінна быць на абодвух мовах
Падпісалі: 4423 чалавек.
Тысячы чалавек просяць, каб ўлада замацавала абавязковасць выкарыстання і рускай, і беларускай моваў на этыкетках.
Вынік: Палата прадстаўнікоў будзе прымаць рашэнне ў красавіку.
Уключыць бел-чырвона-белы сцяг у спіс гістарычных каштоўнасцяў
Фота Сяргея Гудзіліна
Падпісалі: 2299 чалавек.
Вынік: намеснік міністра інфармацыі Аляксандр Яцко палічыў, што для ўключэння сцяга ў спіс гістарычных каштоўнасцяў недастаткова наяўных аргументаў, дакументаў і навуковых даследаванняў.
Захаваць у адзінай агульнарэспубліканскай сістэме разлікаў магчымасць падачы дадзеных з выкарыстаннем інтэрнэту, як гэта было ў komplat.by
Фота: vestka.by
Падпісалі: 2273 чалавек.
Вынік: Зараз беларусы могуць падаваць паказанні лічыльнікаў праз АРІП.
Адмяніць падатак на «балванкі»
Фота: petitions.by
Падпісалі: 1281 чалавек.
Вынік: Дзяржаўны камітэт па навуцы і тэхналогіях РБ вырашыў, што дадзеная прапанова заслугоўвае дэталёвага разгляду і будзе ўключана ў праект зменаў у Закон аб аўтарскім праве.
Перадаць разборкі з шумнымі суседзямі ад супрацоўнікаў ЖЭС міліцыі
Фота: minsknews.by
Ліст у Палату прадстаўнікоў ужо накіравалі 620 чалавек. Усім ім не падабаецца, што ў Беларусі няма адпрацаванай схемы пакарання суседзяў-меламанаў і дэбашыраў: у працоўны час гэтым займаецца ЖЭС. Познім вечарам і ноччу сігналы пра шум прымае міліцыя, прыбывае па выкліку, аднак потым усё роўна перадае справы ў ЖЭС. Працэс зацягваецца.
Падпісалі: 620 чалавек.
Вынік: няма.
Захаваць Веткаўскі музей у Гомельскім парку
Фота: gomelstreet.info
Прадстаўнікі беларускай грамадскасці пратэстуюць супраць пераносу філіяла Веткаўскага музея з Гомельскага парку за 25 кіламетраў ад Гомеля ў горад Ветку: гэта, хутчэй за ўсё, яго знішчыць.
Падпісалі: 1147 чалавек (як адзначыў юрыст рэсурсу Zvarot.by Уладзімір Махнач, для рэгіянальнай кампаніі гэта вельмі добрыя лічбы).
Вынік: няма.
Спыніць парушэнне законнасці ў нашай краіне
Фота Сяргея Гудзіліна
Звароты з патрабаваннем правядзення праверкі дзеянняў дзяржаўных органаў падчас правядзення мірнага сходу, прысвечанага святкаванню Дня Волі 25 сакавіка 2017 г., аўтаматычна накіроўваюцца ў Генеральную пракуратуру.
Падпісалі: за некалькі дзён кампанію падтрымалі 876 чалавек.
Вынік: пакуль няма.
* * *
Удакладнім, што звароты праз Change.org не маюць ніякай юрыдычнай сілы. Іх можа падпісваць любы інтэрнэт-карыстальнік (не толькі з Беларусі), ды яшчэ і не ўказваць сваё імя.
А вось звароты праз Petitions.by і Zvarot.by цалкам адпавядаюць беларускаму заканадаўству. На іх дзяржава мусіць даваць афіцыйны адказ.
