Аўтарка легендарнай Мамы Му наведала фестываль “Горад і кнігі”.
Сёлета на фестываль “Горад і кнігі”, што ладзіцца кожны год, завітала прадстаўніца Шведскай акадэміі дзіцячай кнігі, аўтарка знакамітага цыкла пра прыгоды Мамы Му, Юя Вісландэр.
Кнігі пра прыгоды Мамы Му ўжо даўно папулярныя па ўсёй Беларусі. Лямцавая батлейка, што распавядае пра прыгоды знакамітай кароўкі і яе сябра крумкача, пры падтрымцы кампаніі “Будзьма беларусамі!” аб’ехала ледзь не ўсю краіну.
“Юя пачала пісаць пра прыгоды Мамы Му ў 1985 годзе, то бок болей за трыццаць гадоў таму, — кажа перакладчыца Надзея Кандрусевіч, якую сёлета ўганаравалі прэміяй “Палымяная душа”, якую штогод выдае Шведская акадэмія дзіцячай кнігі. — Гэтыя кнігі перакладзеныя на 30 моваў свету і дагэтуль прадаюцца на ўра, у тым ліку ў Беларусі. На вялікі жаль, беларускамоўнай дзіцячай літаратуры ў нас меней, чым хацелася б, і развіваецца яна павольна. Таму кнігі Юі, апроч таго, што напісаныя па-майстэрску, яшчэ і папулярызуюць беларускую мову сярод дзяцей”.
Напярэдадні адкрыцця выставы “17 прычын чытаць дзіцячыя кнігі” Юя Вісландэр сустрэлася з беларускімі чытачамі.
“Учора мне дзякавалі за “Маму Му” бацькі, — кажа спадарыня Юя, — ім весела чытаць мае кнігі разам з дзецьмі, яны кажуць, што ў гэтых кнігах ёсць адчуванне свабоды, бо кніга не мае асноўнай мэтай вучыць ці навучыць чаму-небудзь. Таму я не здзіўляюся, што гэтыя кнігі ў Беларусі папулярныя не меней, чым у іншых краінах”.
Выстава “17 прычын чытаць дзіцячыя кнігі” ўпершыню трапіла за мяжу: створаная Акадэміяй дзіцячай кнігі, яна мае на мэце папулярызаваць не толькі чытанне, але і працу ілюстратараў дзіцячай літаратуры.
“Акадэмія, сябрам якой я з’яўляюся, адказвае за абарону правоў дзяцей на чытанне, мы імкнёмся ўсяляк уплываць на людзей, якія адказваюць за выдавецкую палітыку ў Швецыі, да нас часта звяртаюцца па парады”, — распавядае Юя Вісландэр. — Што да выставы, то мы ўпэўненыя, што ілюстрацыі ў дзіцячай літаратуры — гэта вельмі важны момант, таму мы завастрылі ўвагу на працы мастакоў”.
“У наш час прынята казаць, што дзеці меней цікавяцца кнігамі, чым раней, — кажа першы сакратар шведскай амбасады ў Беларусі Магнус Сэстэрберг, — але я ўпэўнены, і статыстыка гэта пацвердзіць, што кніга, у тым ліку папяровая, мае будучыню. Вельмі прыемна, што наша выстава ўпершыню паўнавартасна прэзентуецца па-за межамі Швецыі менавіта ў Мінску”.
Выставу “17 прычын…” можна знайсці на сайце Шведскай акадэміі дзіцячай кнігі, з подпісамі, перакладзенымі на розныя мовы свету.
Выставу можна ўбачыць 18 і 19 мая на фестывалі “Горад і кнігі” ва ўнутраным дворыку БНТУ па адрасе: праспект Незалежнасці, 65.
Мікалай Левертаў, фота Вікі Трэнас
