Творчая сустрэча з бардам і дударом Змітром Сідаровічам адбылася 13 чэрвеня ў спартыўна-турыстычным лагеры “Глобус” вёскі Шылавічы Слонімскага раёну. Сустрэча праходзіла пры падтрымцы кампаніі “Будзьма беларусамі!”
Кажа Зміцер Сідаровіч: “Я прынцыпова выступаю перад рускамоўнымі людзьмі. Гэта цікава і важна, дзеля гэтага можна ехаць у далёкія куткі Беларусі. Падтрымліваць саміх сябе, ладзячы так званыя “закрытыя канцэрты ў закрытых беларускамоўных асяродках” – гэта памылка”.
Нечаканай падмогай у канцэрце сталі ўдзельнікі праекту “DJ Адраджэння” Алесь Луцэвіч, Аліна Сянюта, Таццяна Мяняйлава, Алена Пяткоўская. Маладыя людзі з задорам правялі віктарыну на тэму “Ці ведаеце вы Беларусь?”
Адзін з арганізатараў сустрэчы, педагог лагера Алесь Масюк, зазначыў, што лагер будзе дзейнічаць усё лета і выказаў пажаданне правесці яшчэ некалькі сустрэчаў з бардам, бо склад дзяцей, што тут адпачываюць, мяняецца. Акрамя таго ён выступіў з ініцыятывай арганізаваць падобны выступ з паказам беларускіх танцаў у самім Слоніме.
Гаворыць Алесь Масюк: “Мы робім упор на краязнаўства, спорт і турызм, дбаем пра духоўнае развіццё дзяцей. Бацькі задаволеныя адпачынкам дзяцей. Што непакоіць? Хіба не зусім хапае запісаў сучаснай беларускай музыкі, якую так любяць дзеці, і кантактаў з дзеячамі беларускага адраджэння. Прыязджайце яшчэ!”
