31-га студзеня ў бібліятэцы імя Астроўскага г. Мінска адбылася цікавая літаратурная сустрэча навучэнцаў 8-х і 9-х класаў СШ № 145 з пісьменнікам Васілём Дранько-Майсюком.
Тэма – сучасная беларуская літаратура. Госць адразу ж катэгарычна сказаў, што пытанне сучаснасці ў гэтым плане дастаткова ўмоўнае. Надзённа і цалкам сугучна нашаму дню можа гучаць і Максім Гарэцкі і Змітрок Бядуля і нават Мікола Гусоўскі.
Гаворка ж у асноўным вялася пра караля нашай літаратуры 20-х гадоў Уладзіміра Дубоўку. Слухачы даведаліся шмат новага і незвычайнага пра гэтага вялікага чалавека, які ні пры якіх цяжкіх варунках не схіляў галавы, не панікаваў і заставаўся сабой. Заўсёды выглядаў, як сапраўдны галівудскі герой.
Акрамя таго, у займальна-інтэрактыўнай манеры, прысутныя пазнаёміліся з творчасцю такіх адметных аўтараў, як Пятрусь Броўка, Анатоль Грачанікаў, Віктар Жыбуль, Валярына Кустава. Сустрэча доўжылася больш за гадзіну і прайшла, як адно шчаслівае імгненне.
Напрыканцы сустрэчы ўдзельнікі атрымалі памятныя падарункі ад культурніцкай кампаніі “Будзьма беларусамі!”.
