Фестываль беларускамоўнай аўтарскай песні „Бардаўская восень” пачынае прыём заявак на сёлетнюю конкурсную праграму. Як і штогод, музыкі розных стыляў могуць паспрабаваць сябе ў адным са старэйшых песенных конкурсаў беларускай сцэны. Свае акустычныя выступы для журы і менскай публікі змогуць прэзентаваць як сольныя выканаўцы, так і гурты ў акустычных складах. Адзінымі ўмовамі ўдзелу ў адборачным канцэрце фестываля з’яўляецца паўнагадовы ўзрост выступоўцаў ды песні на беларускай мове. Найлепшыя з выступоўцаў менскага адборачнага канцэрту пазмагаюцца за гран-пры фестываля ў Бельску Падляшскім у Польшчы – галоўнай фестывальнай сцэне „Бардаўскай восені”.
Каб далучыцца да сёлетніх канкурсантаў дастаткова даслаць заяўку на адрас [email protected] не пазней 16 верасня. Адборачны канцэрт сёлетняга фестывалю адбудзецца ў менскім клубе „ILI” 18 верасня ў 18:00. Апроч канкурсантаў на канцэрце выступяць спецыяльныя музычныя госці, якіх арганізатары пакуль трымаюць у сакрэце.
„Бардаўская восень” не змяняе сваім прынцыпам ужо больш за 20 год, спалучаючы традыцыі бард-выканаўцаў з актуаліямі беларускай музыкі. На сцэне фестываля ў розныя гады з’яўляліся найгучнейшыя імёны, сярод якіх Лявон Вольскі, Алег Хаменка, Кася і Алесь Камоцкія, Зміцер Вайцюшкевіч, гурты „N.R.M.”, „B.N.”, праект „Народны альбом”. Але галоўнай падзеяй фестывалю штогод была і застаецца конкурсная праграма, мэта якой адкрыць і падтрымаць новыя імёны беларускай аўтарскай песні. Сярод мінулагодніх лаўрэатаў конкурсу Паліна Рэспубліка, Яўген Барышнікаў, Аляксандр Ясінскі, гурты „Re1ikt”, „Нельга забыць” і іншыя.
Усе пытанні адносна заявак і ўдзелу ў конкурсным адборы можна кіраваць для арганізатараў фестываля па адрасе [email protected], альбо ў суполках фестываля ў сацыяльных сетках.